No regreso das Nosas deportivistas ao Estadio ABANCA Riazor o RC Deportivo ten activado un protocolo de acceso que permite a entrada de balde para as persoas abonadas do Dépor, pero que require da expedición dunha entrada. Para conseguila so tes que entrar nesta ligazón bancada.rcdeportivo.es, introducir a túa ID de socia e os 4 últimos díxitos do teu DNI. Logo xa poderás elixir o teu sitio na bancada de Riazor entre os que queden libres. A entrada envíase por correo electrónico, segundo informa o RC Deportivo.
📽️ Non quedes sen a túa entrada para animar #ÁSNOSAS!
➡️ Obrigatoria e gratuíta para socios.
➡️ 5€ para público xeral que se doarán á Asociación Española contra o Cancro.📍 Poden adquirirse na OAD ou en 🔗https://t.co/U3CPFt80Zl pic.twitter.com/Vpi29WNdoC
— Dépor ABANCA (@RCDeportivoFem) November 8, 2023
O vindeiro domingo 12 de novembro o Dépor ABANCA recibe no Estadio ABANCA-RIAZOR ás 17:00 horas ao Deportivo Alavés Gloriosas en partido correspondente á 8ª xornada en Primera Federación Iberdrola. O cruce pódelo ver tamén na canle de Youtube do RC Deportivo.
Para ver o partido ao vivo no templo deportivista, as persoas abonadas ao RC Deportivo teñen até o propio día do partido para sacar de forma gratuíta a súa entrada a través da web bancada.rcdeportivo.es, onde poderán escoller asento xa que non terán asignado o seu.
Podes quitar a entrada incluso o domingo
Tal e como explica o RC Deportivo, para acudir a este partido entre Dépor ABANCA e Deportivo Alavés Gloriosas a “entrada é obrigatoria xa que ese día non se poderá acceder co carné de socio, seguindo un protocolo similar ao dos partidos do Dépor ABANCA e o Fabril na Cidade Deportiva de Abegondo”.
Detallan desde club coruñés que as persoas abonadas “teñen até o propio día do partido para sacar de forma gratuíta a súa entrada a través da web bancada.rcdeportivo.es, onde poderán escoller asento xa que non terán asignado o seu”.
O proceso para retirar a entrada unha vez dentro desa ligazón bancada.rcdeportivo.es é o seguinte: “Os socios e socias deberán introducir a súa ID de socio e os 4 últimos números do DNI. A continuación, seleccionar unha localidade libre na bancada e posteriormente completar os seus datos de contacto e a dirección de correo electrónico onde recibir a entrada. Con eses mesmos datos das outras socias, unha única persoa pode retirar máis dunha entrada nunha soa xestión, até un máximo de 6 por operación, e, deste xeito, seleccionar asentos contiguos ou próximos”. Así poderedes sentarvos xuntas en Riazor.
Outra maneira de retirar a entrada “é presentando o DNI ou o abono, os socios e socias tamén poderán retirar a entrada na Oficina de Atención ao Deportivismo (OAD), na Avenida da Habana s/n, no seu horario habitual o venres de 10:00 a 13:30 e de 16:30 a 19:00; e nos despachos de billetes do Palacio dos Deportes o sábado 11 de novembro desde as 16:00 até o descanso do partido do Dépor ante a SD Logroñés que empeza ás 19:00; e o domingo 12 desde as 15:00 horas até o descanso do encontro das Nosas”, relatan desde o RC Deportivo.
O recindo deportivo irase abrindo segundo se enchan as bancadas. En principio está previsto abrir “unicamente o anel inferior do Estadio ABANCA-Riazor, empezando polas bancadas de Tribuna e Preferencia, habilitándose o resto de bancadas de forma gradual no caso de que sexa necesario”, informan desde o RC Deportivo.
Como fago se non son socia do Dépor?
Para o público que non é socio/a do RC Deportivo, as entradas terán un prezo de 5 euros, que se doarán integramente á Asociación Española Contra o Cancro (AECC), que ademais porá huchas por todo o estadio tanto neste partido como no do día anterior entre Dépor e SD Logroñés.
Explica o Dépor que “as entradas poderán adquirirse até o propio día do partido a través de bancada.rcdeportivo.es; na OAD o venres de 10:00 a 13:30 e de 16:30 a 19:00; así como nos despachos de billetes do Palacio dos Deportes o sábado 11 de novembro desde as 16:00 até o descanso do partido do Dépor que empeza ás 19:00, e o domingo 12 desde as 15:00 horas até o descanso do encontro das Nosas“.
Adestramento das deportivistas en Riazor
O Dépor ABANCA adestra o venres no escenario do partido, o Estadio ABANCA-RIAZOR, para facerse co terreo de xogo, diferente á Cidade Deportiva de Abegondo onde adoita xogar como local o conxunto branquiazul.
A última vez que As Nosas deportivistas xogaron en Riazor foi xustamente contra deste rival, o Deportivo Alavés Gloriosas no transcurso do último Trofeo Teresa Herrera. Ese cruce caeu do lado coruñés por un tanteo de 2-0. Desde agosto a este mes de novembro ambos os dous equipos teñen evolucionado pero a adestradora deportivista, Irene Ferreras, confía no seu equipo, líder da categoría, para repetir triunfo.
Na súa comparecencia ante os medios antes do partido , Irene Ferreras explicaba que “as sensacións son moi boas e o equipo está moi ben”.
Visitas das Nosas a centros educativos
Nesta semana as futbolistas branquiazuis visitaron varios colexios da cidade como o Fogar de Santa Margarita o CEIP Víctor López Seoane, neste último caso acompañadas tamén pola alcaldesa da Coruña Inés Rey, ou o CEIP María Pita para animar á mocidade coruñesa a asistir ao partido. Para iso, as xogadoras repartiron invitacións entre os alumnos e alumnas, segundo informa o club herculino.
💙 #AsNosas animaron ao alumnado do CEIP María Pita a asistir ao partido do domingo en #ABANCARIAZOR.
Entradas dispoñibles en 👉https://t.co/U3CPFt80Zl pic.twitter.com/NUDPCIO1Te
— Dépor ABANCA (@RCDeportivoFem) November 9, 2023
💙 #AsNosas animaron ao alumnado do Fogar de Santa Margarida a asistir ao partido do domingo en #ABANCARIAZOR
👉 Michelle Clemente e o concelleiro de Educación, Emprego e Relacións Institucionais acompañaron a Samara, Raquel García e Paula Gutiérrez
🔗 https://t.co/HEHlCNA0ac pic.twitter.com/SEy6PpWOoJ
— Dépor ABANCA (@RCDeportivoFem) November 7, 2023
💙 #AsNosas visitaron o CEIP Víctor López Seoane para animar á mocidade coruñesa a asistir ao partido do próximo domingo en #ABANCARIAZOR
👉 Álex Bergantiños e a alcaldesa acompañaron a Cris Martínez e Paula Monteagudo
🔗 https://t.co/6uOfv4OB4c pic.twitter.com/EPFleV7xUf
— Dépor ABANCA (@RCDeportivoFem) November 6, 2023
