Cada vez que se comunican novos cambios nas restricións por mor da COVID-19 as dúbidas aparecen nos diferentes ámbitos da vida. Tamén, como non podía ser doutro xeito, na práctica deportiva. Por exemplo:
- Podo saltarme un peche perimetral para ir a adestrar?
- Estou exenta de respectar o toque de queda se teño competición?
Desde a Federación Galega de Atletismo fíxose pública unha interpretación da aplicación do Decreto 3/2021 e da orde do 13 de xaneiro ao deporte federado. Trátase do Decreto da Xunta de Galicia que contén as medidas que se adoptan no territorio da Comunidade Autónoma de Galicia para facer fronte á crise sanitaria e conter a propagación de infeccións causadas polo SARS-CoV-2.
Compartimos con vós esa interpretación da FGA por se vos resulta de utilidade na vosa práctica deportiva, pero lembrade que o mellor é sempre consultar coa vosa federación:
“Con carácter xeral recoméndase restrinxir ao máximo a interacción social e que os encontros queden limitados unicamente á unidade de convivencia, limitándose a mobilidade o máximo posible.
Neste senso, esta é a óptica ou criterio sobre os que ten que pivotar o desenvolvemento da actividade deportiva federada, nun momento de excepcionalidade e que a evolución da pandemia esixe ser extremadamente cauteloso e responsable.
Aínda con todo, o deporte federado nas normas citadas segue a estar dotado dun status propio, polo que a súa práctica segue a estar permitida debendo de axustarse ao disposto nos respectivos Protocolos aprobados segundo o modelo Fisicovid-Dxtgalego.
Non obstante, isto non implica que as excepcións nas limitacións impostas sexan totais senón que é preciso que se baseen en causas xustificadas.
Así con respecto as restricións de mobilidade de ou cara ás localidades con peches perimetrais mantense o mesmo criterio interpretativo que ata o de agora, considerándose situación xustificadas:
Quedan exceptuados de tales limitacións aqueles desprazamentos, adecuadamente xustificados, que se realicen en cumprimento de obrigas laborais e profesionais, conforme o disposto na letra b) do número 3 do punto primeiro do Decreto 179/2020, do 4 de novembro, e na letra d) do número 1 do artigo 5 do Real decreto 926/2020, do 25 de outubro.
Con relación a “Calquera outra actividade de análoga natureza, debidamente acreditada“, previsto na letra k) do número 3 do punto primeiro do Decreto 179/2020, do 4 de novembro, e na letra h) do número 1 do artigo 5 do Real decreto 926/2020, do 25 de outubro, considéranse xustificados os desprazamentos para a realización dun adestramento vinculado á participación nunha competición incluída no calendario oficial da correspondente federación deportiva e/ou pola participación nunha competición deste tipo.
Neste suposto deberase de acreditar:
Que non existan alternativas de realización do adestramento e/ou da celebración da competición nun ámbito territorial que exixa un desprazamento afectado polas limitacións á liberdade de circulación vixentes.Que o desprazamento se realice por algunha ou algunhas das seguintes persoas: Por persoas deportistas federadas de alto nivel, de alto rendemento deportivo ou incluídas en programas de tecnificación e rendemento deportivo, recoñecidas polo Consejo Superior de Deportes ou pola Secretaría Xeral para o Deporte. Por outras persoas deportistas federadas, respecto de competicións de ámbito estatal ou de ámbito autonómico non profesional cun calendario aprobado para a tempada 2020/2021. As persoas técnicas ou adestradoras das persoas deportistas incluídas nos apartados anteriores.
Que a persoa que se desprace porte, durante o desprazamento, un certificado da correspondente federación ou club deportivo federado onde se certifique a condición do/a deportista e a causa da exención ás restricións de mobilidade.
Con respecto ao cumprimento á limitación da mobilidade nocturna entre as 22:00 h e as 06:00h, como regra xeral e en atención á situación epidemiolóxica actual esta hora debe de respetarse, polo que os adestramentos e competicións deben de rematar un pouco antes das 22:00 h, permitíndose o desprazamento con posterioridade para o regreso ao domicilio habitual”.
