En Galicia, a evolución do futfem e o futsalfem, fútbol gaélico e a última incorporación, o fútbol a pé, está a ser imparable. Tanto no ámbito social, acadando cada vez máis seareiras, como no número de licencias federativas. Desde a Real Federación Galega de Fútbol (RFGF) fixeron público que o número de licencias femininas coas que contan é de 9.415 licencias e 341 equipos.
As mulleres reclaman o seu sitio no fútbol (en todas as súas variantes), tamén en Galicia. No fútbol sala está comprobado por títulos, licencias e equipos na élite que Galicia é potencia estatal. E no resto de disciplinas ligadas ao balompé os números medran e os equipos tamén.
Explican desde a RFGF que nas catro modalidades deportivas que contan con licencias na Real Federación Galega de Fútbol, a lista de futbolistas está preto das 10.000. Súmanse nesa lista o fútbol a pé, o fútbol gaélico, o futbol sala e o fútbol.
Os números están aí. As licenzas de fútbol feminino en Galicia creceron de xeito exponencial desde o ano 2009. Trátase da comunidade na que máis aumentaron o número de federadas na última década.
Ao peche do exercicio 22/23, o número de futbolistas (de todas as idades) que tiñan unha licenza federativa (xogadoras e corpos técnicos) ascende a 9.415, case dous milleiros máis que o curso pasado. Destas 9.415, 3.440 pertencen ao fútbol sala, unha disciplina na que Galicia é un dos berces da modalidade en España.
En número de equipos, pola súa banda, Galicia pechou a campaña 22/23 cun total de 341, dos que 210 son de fútbol.
Aseguran desde a RFGF que a “admirable cifra que recolle hoxe o noso fútbol responde a unha estratexia que arrincou en 2015 co obxectivo de crear e impulsar as categorías inferiores na formación de xogadoras. Coa creación de equipos de base femininos e a aposta polas seleccións inferiores derrubamos moitas barreiras durante os últimos oito anos”.
Ademais das categorías estatais, nas que Galicia conta con 11 representantes (Primera Federación Futfem, Segunda Federación Futfem e Tercera Federación Futfem), o fútbol galego feminino autonómico contou na tempada pasada cun total de 210 equipos distribuidos nas seguintes categorías:
- Primeira División Galega Feminina – Arzúa-Ulla DOP
- Segunda División Galega Feminina
- Liga Galega Cadete
- Liga Galega Infantil
- Liga Promesas
- Liga Galega Feminina de Fútbol 7
Créase unha nova categoría sénior de fútbol
Nesta campaña 23/24 xa consta na RFGF 250 equipos á a Federación está a espera do peche da inscrición das categorías de Fútbol 8.
Cómpre salientar, ademais, que nesta curso dase un novo paso coa creación dunha nova categoría sénior galega (Primeira, Segunda e Terceira) e a posta en marcha da categoría alevín, quedando a Promesas para as prebenxamíns e as benxamíns.
O FutSal galego, referente estatal
En todo isto non hai que esquecer o destacado papel do fútbol sala no auxe desta categoría en Galicia. Estamos nun dos berces da modalidade en España, con 11 equipos en categoría estatal. Botando contas, Galicia ten seis representantes na máxima categoría e cinco na segunda.
Para o 40×20, a RFGF tamén puxo en marcha categorías de base única e exclusivamente femininas para as seguintes categorías:
- Preferente Feminina (Sénior)
- Xuvenil
- Cadete
- Infantil
- Alevín
- Benxamín (por primeira vez na historia)
Cómpre salientar, ademais, a campaña “Xogando con Futgal” que percorre durante o curso todos os colexios da nosa comunidade e coa que a RFGF pretende promocionar a práctica do fútbol sala.
