A cidade de Durres, en Albania, acolle os Campionatos de Europa Junior de halterofilia no que a coruñesa Ruth Fuentefría vén de colgarse dúas medallas de bronce no pescozo. As marcas de Ruth Fuentefría neste campionato Europeo Junior foron 66 quilos en arrancada, 77 quilos en dous tempos e 143 quilos en total olímpico.
A deportista do Club Halterofilia Coruña competía en 45 kilos e facíao como debutante na categoría junior (para menores de 20 anos). O ano pasado xa tiña conseguido o bronce continental pero entre as halteras Sub-17. Este curso dá un paso máis na súa carreira deportiva e, logo dunha boa competición, foi quen de acadar dúas medallas de bronce, unha en arrancada e outra no total olímpico. So lle faltou a modalidade de dous tempos na que rematou nun meritorio cuarto posto, a piques de entrar no podio e repetir bronce facendo o pleno.
O primeiro posto en arrancada e total olímpico foron para a turca Cansu Bektas, seguida da salmantina Marta García e, por detrás delas, no terceiro lugar: Ruth Fuentefría.
Polo que atinxe á modalidade de dous tempos, repetiuse o podio a excepción do terceiro lugar que foi para a rumana Ioana Mirón. Como deciamos previamente, Ruth Fuentefría finalizou cuarta nesta ocasión.
Así quedou o podio na categoría júnior de 45 Kg tal e como informa a Federación Española de Halterofilia:
- TUR- Cansu Bektas- 157 Kg.
- ESP- Marta García- 148 Kg.
- ESP- Ruth Fuentefria- 143 Kg.
Ver esta publicación en Instagram
