Xa coñecemos aos equipos finalistas da Copa e da Supercopa Galicia, finais que se disputarán mañá domingo 5 de setembro no Gatañal, nunha xornada na que se renderá homenaxe a Fran Teixeira, recentemente falecido. Na categoría feminina Rubensa BM Porriño e SAR Rodavigo serán os conxuntos que disputen o título.
Tras a disputa dos partidos desta xornada, na Copa Galicia feminina, os conxuntos finalistas son o Rubensa BM Porriño e o SAR Rodavigo. Ambos o dous equipos veranse as caras na pista do Gatañal ás 13:00 horas de mañá domingo 5 de setembro.
O Rubensa BM Porriño foi o primeiro en acadar a clasificación tras superar na semifinal do sábado ao CdeC Lavadores. Foi un partido con diferentes fases, aínda que sempre co Porriño por diante no marcador. No tramo final da primeira metade, o CdeC Lavadores logrou axustar a defensa e reducir distancias. Pero na segunda parte, o Rubensa BM Porriño foi superior e pechou unha ampla vitoria (34:23).
Na segunda semifinal a SAR Rodavigo logrou o pase para a final, tras superar ao Samertolameu nun disputado e entretido encontro. Despois dun inicio moi igualado, a SAR Rodavigo logrou irse no marcador para alcanzar o descanso cun 12:18 ao seu favor. Na segunda metade, non sufriu para pechar o triunfo e a clasificación (25:30).
A final da Copa Galicia masculina: Forbe Reconquista vs Granitos Ibéricos Carballal
Por horario, a primeira das finais será a Copa Galicia masculina, na que se enfrontarán Forbe Reconquista e Granitos Ibéricos Carballal que xogarán ás 11:00 horas. Ambos conxuntos vigueses lograron o seu pase nas semifinais disputadas o venres no pavillón de O Gatañal de Cangas, onde tamén se vai disputar o partido final.
A primeira semifinal enfrontou a Forbe Reconquista de Vigo e Seis do Nadal, nun derbi vigués con dúas partes moi diferentes: Na primeira o Forbe Reconquista foi moi superior (19-9) e na segunda, o Seis do Nadal remontou ata poñer un pouco de emoción no marcador nos minutos finais. Resultado final, 31:27.
Na segunda semifinal impúxose o Granitos Ibéricos Carballal ao Automanía Luceiros, nun partido igualado e de alternativas. Na primeira metade, despois dun inicio igualado, o Granitos Ibéricos Carballal logrou escaparse no marcador (14:11), pero na reanudación o Automanía Luceiros deulle a volta e logrou mesmo poñerse por diante. No tramo final, o conxunto vigués reaccionou e terminou vencendo e clasificándose para a final (27:26).
Supercopa Galicia Masculina
Hoxe, sábado 4 de setembro, tamén se disputaron as semifinais da Supercopa Galicia masculina. O Frigoríficos do Morrazo amosou na pista que é un equipo de Asobal e gañou con solvencia ante un Disiclín Lalín, que además chegaba con moi poucos adestramentos nas pernas, despois de saír dun confinamento. Resultado final 38:19.
Na segunda semifinal enfrontábanse Cisne Colegio Los Sauces e Acanor Novás Valinox, dous equipos da mesma categoría (División de Honra Prata Masculina), pero o Acanor Novás Valinox afrontaba o choque con varias e importantes baixas. A pesar diso estivo moi concentrado e metido no partido. Ao descanso, 16:16. Na segunda metade, parecía que o Cisne Colegio Los Sauces lograba escaparse no marcador, pero volveu reaccionar O Acanor Novás Valinoxpara chegar con opcións ao tramo final, pero nestes minutos finais os pontevedreses pecharon o triunfo sen sufrimento.
Guardés e BM Porriño xogan a Supercopa feminina
A final da Supercopa masculina, que enfrontará aos equipos do Frigoríficos do Morrazo BM Cangas e o Cisne Colegio Los Sauces, celebrarase mañá, domingo 5 de setembro, a partir das 19:00 horas en Cangas. Mentres que a feminina, que disputarán o Mecalia Atlético Guardés e o Conservas Orbe BM Porriño disputarase ás 17:00 horas, nunha nova xornada de balonmán galego sobre a pista do Pavillón do Gatañal de Cangas.
O Guardés afronta un ensaio xeral do inicio ligueiro enfrontándose ao Aula e ao Porriño
