Segundas partes non son boas para o Ulla Oil Rosalía. Varias xornadas sen gañar facían que as galegas chegasen a esta xornada necesitadas dunha vitoria que finalmente non conseguiron. Malia aguantar ben o pulso ao HGB Ausarta Barakaldo na primeira parte, no segundo as visitantes fixéronse co trunfo (53-61).
Con esta derrota, as compostelás seguen penúltimas na Liga Feminina 2 a só un punto das colistas, o Magec Tías. Actualmente, o Rosalía é, xunto á ADBA, o equipo en peor racha competitiva, con catro derrotas consecutivas. O equipo que peor estaba antes desta 22ª xoranda era precisamente o Barakaldo, o rival das galegas a pasada fin de semana.
Da igualdade á derrota no Rosalía
O partido comezou con dous equipos nun mal momento deportivo que loitaban na pista por alonxar ás pantasmas das derrotas.
Malia estar en situacións distintas (o Rosalía pelexando por non descender e o Barakaldo acomodado na zona media), enseguida viuse sobre a cancha do instituto un pulso igualado.
Cun quinteto titular formado por Blanca, Carla, Nuria, Sara e Leti, o Rosalía saltaba ao seu parqué disposto a levarse ao contrario por diante. O mesmo plantexamento seguiu o Barakaldo, chegando a equilibrar a balanza e rematando os primeiros minutos co electrónico conxelado no empate (17-17).
Para o seguinte parcial, o duelo seguía na mesma tónica. A igualdade reinaba sobre a pista sen deixar un claro vencedor. Porén, as vascas lograron un solitario punto máis que as galegas, o que lles permitiu chegar ao descanso cunha lixeira vantaxe (29-30).
A pausa e verse por debaixo no marcador serviu para as pupilas de Chiqui Barros reaccionasen tras a reanudación. As novatas aguantaban o ritmo e contestaban ás canastras recibidas, acechando perigosamente ás visitantes. Así ata chegar ao empate, compensando o punto de diferenza do segundo cuarto.
O último tempo do partido comezaba co resultado completamente aberto e con posibilidades de vitoria para calquera equipo.
O Rosalía mantiña as posibilidades de sumar os dous puntos, pero todo cambiou no 43-44. Unha loita pitada determinou o saque para o Barakaldo, que aproveitou para encaixar catro puntos seguidos. Así, as vascas descolgábanse das locais conseguindo unha vantaxe que as brancas xa non contrarrestarían.
Este golpe foi demasiado para as de Barros, que viron como perdían o partido sen ser capaces de solucionalo. Seguiron presionando pero os tiros xa non entraban, mentres que as vascas anotaban sen problemas. Desta forma chegou o 53-61 final, na cuarta derrota seguida para o Rosalía.
Revive o partido retransmitido vía streaming nesta ligazón.
FICHA TÉCNICA
53) ULLA OIL ROSALÍA: Blanca Manivesa (6), Carla García (5), Nuria Chorén (3), Sara Corredoira (21) e Leticia Soares (8) – quinteto inicial -. Tamén xogaron: Ángela, Clara Riera (4) e Nerea Liste (6).
61) HGB AUSARTA BARAKALDO: Vergara (2), Aina Martín (13), Karamovic (19), Lo Sylla (3) e Chahrour (17) – quinteto inicial -. Tamén xogaron: Uchendu (2), Ortega, María Romero (2), Lewis (3) e Beatriz Torres.
PARCIAIS: 17-17, 12-13, 12-16 e 12-21.
ÁRBITROS: Romina Marchiano e Daniel López Illán.
INCIDENCIAS: Partido da 22ª xornada da Liga Feminina 2 disputado no Instituto Rosalía.
