Practicamente in extremis, o Ulla Oil Rosalía escapou na última xornada da posición de descenso pero, con dous partidos aínda por disputar, o traballo non está feito. A primeira destas dúas últimas citas será este sábado, 20 de marzo, ás 19:00 horas, ante o Osés Construcción Ardoi.
Este será un rival complicado e de altura para as galegas, que sendo segundas pola cola enfróntanse ás segundas da Liga Feminina 2. As xogadoras de Chiqui Barros deberán deixalo todo na pista navarra para manterse fóra de perigo.
Neste momento, o Rosalía ocupa a penúltima posición con 30 puntos, empatando co Magec Tías e coa AD Cortegada, e só a un punto do ADBA. Fronte as asturianas, ademais desta lixeira vantaxe na clasificación, as compostelás teñen gañado o average, despois do resultado obtido a pasada fin de semana.
O Rosalía aproveita a súa oportunidade para soñar coa permanencia (69-53)
Pola súa banda, o Ardoi chega nunha posición comprometida. As navarras seguen segundas, pero a derrota colleitada na anterior xornada ante un imparable Celta, déixaas só cun punto de vantaxe respecto ás galegas.
Coa confirmación de que ambos equipos estarán na loita polo ascenso na segunda fase, queda por saber se o Ardoi ou as viguesas chegarán na posición de prata. Esta da a posibilidade de evitar aos líderes de cada sector no cuarto grupo da segunda fase.
O Celta non falla e pásalle por riba a un rival directo (65-35)
O Rosalía puxo contra as cordas ao Ardoi na primeira volta
Para esta xornada, tan relevante para o futuro das brancas, o conxunto de Chiqui Barros terá que tomar nota do enfrontamento da primeira volta.
Nel, as novatas galegas foron quen de tratar de ti a ti ao Ardoi, materilizando o seu crecemento na competición. Malia non ter sumado os dous puntos, por un resultado final 61-68, o Ulla Oil Rosalía foi quen de levar ás navarras ata o seu límite, dando un espectáculo do baloncesto.
Para esta fin de semana, coas medidas das locais xa tomadas, as brancas teñen unha oportunidade máis de afianzarse na LF2.
O Rosalía perde cun moi bo partido ante un dos grandes da LF2
