Unha xornada máis, o crecemento do Ulla Oil Rosalía na Liga Feminina 2 é moi salientable. Aínda que non acade vitorias na casa, un excelente partido contra o Osés Construcción Ardoi, segundo clasificado, fai que o técnico, Chiqui Barros, declare que “seguimos no camiño correcto”.
A táboa clasificatoria xa non reflexa o xogo do Rosalía, que foi un digno rival para un dos mellores equipos da categoría. Malia ocupar a penúltima posición, con 12 puntos, pero dous partidos aínda por xogar, o cadro de Barros leva unha boa racha competitiva, que non se traduce en vitorias.
En palabras do técnico compostelán, as galegas enfrontábanse ao “mellor equipo da competición, se quitamos o plantel que é superior a todo o mundo, o BAXI”. Un rival duro, ao que o Rosalía foi quen de plantarlle cara.
Chiqui Barros: “Logramos levar ao rival ao límite, nun fantástico partido de baloncesto”
“Logramos levar ao rival ao límite nun fantástico partido de baloncesto. Creo que fixemos todo con coherencia, defensivamente fixemos algunhas cousas notabilísimas. Cunha proposta en ataque sen xogadas, practicamente todo o tempo, o cal é realmente complicado, e que nos permitiu estar vivas en moitos momentos”, resumiu o adestrador.
O Rosalía medra na derrota
Xa no primeiro cuarto puidose ver a un conxunto galego forte e seguro de si mesmo. Un bo parcial para as visitantes fixo que o técnico local solicitase un tempo morto para axustar a defensa, o que deu bos resultados. Ambos equipos chegaban sen problema á canastra, nun vaivén de tantos que rematou nun 22-25 pasados os primeiros dez minutos.
Nos seguintes dez, o equipo dirixido por Barros apretou no marcador, mentres que a sequía anotadora castigaba ao Ardoi. Para o descanso, as compostelás ían por diante no marcador.
Tras a pausa, o cadro visitante entrou moito máis enchufado, recuperandose a nivel defensivo e en ataque. As xogadoras ás ordes de Jotas apretaron ao rival e freou en seco ao Rosalía e invertiron os papeis do cuarto anterior. Cun resultado de 9-17 no terceiro cuarto, as navarras chegaban con sete puntos por diante ao último parcial.
No último tempo, as locais non quixeron dar nada por perdido e non baixaban os brazos. Con todo, os esforzos das xogadoras galegas non foron suficientes e, cun 17-18 no último cuarto, o partido rematou cun axustado 61-68 final.
Un adestrador máis que orgulloso
Unha boa mostra do crecemento deste equipo, que no comezo da tempada situábase como claro colista, é a reacción do seu adestrador, Chiqui Barros, tras cada partido.
Despois de lograr un axustado 61-68 contra o Ardoi e incluso ir ao descanso por diante, Barros declaraba que “aínda que soe a tópico, non sinto orgullo, sinto o seguinte”.
Disfrutar de la tensión de la competición no es nada fácil. Pues este equipo me hace disfrutar cada vez que las veo. Por compromiso, esfuerzo, fe, dedicación y BALONCESTO. Muchas gracias por todo, chicas. Hoy, otra lección.@RosaliaFEDESA
— Chiqui Barros (@chiquibase) December 12, 2020
Despois do encontro, o técnico explicaba que “chegou un momento non que non puidemos máis. Pero chegar ao descanso arriba, levar o partido ao límite como o fixemos e facer que un equipo que xoga tan ben como é o Ardoi teña que xogar ata a última posesión, é motivo de satisfacción e de recoñecemento ao equipo e as xogadoras”.
Sarai Carro: “Fixemos moitas cousas que hai un mes non facíamos. Imos polo bo camiño”
Sensacións coas que coincide Sarai Carro, máxima anotadora do duelo. “Estamos moi contentas co partido que xogamos, creo que lle plantamos cara, pero hai cousas que mellorar. Fixemos moitas cousas que hai un mes non facíamos Imos polo bo camiño. Os adestradores márcannos unhas pautas nas que cremos e todo o equipo está convencido de que esta é a forma de xogar”, declaraba a xogadora no post partido.
“Estamos demostrando que, aínda con desvantaxes, temos moitas cousas a favor tamén e estamos a plantarlle cara a todos os equipos. Temos que mellorar detalles, que sempre hai que seguir mellorando, e ir a polo seguinte partido”, sinalaba.
O obxectivo antes de Nadal pasa por lograr unha vitoria máis
Para manter estas boas sensacións, o adestrador sinala que o importante é “manter a liña e seguir mellorando en cada adestramento”. Para esta tempada, o Rosalía ten dous obxectivos: O primordial, que é mellorar o seu xogo e o competitivo, que é salvar a categoría.
Para este último, Barros entende que serán necesarias entre seis e oito vitorias para o final do curso, das cales xa levan dúas. Por iso, nos partidos que quedan (o que pon punto final á primeira volta e dous atrasados), “esperamos ser capaces de sacar algo. Metémonos nunha fase, xusto antes das vacacións, moi ilusionante e agardo que sexamos capaces de irnos a Nadal con polo menos unha vitoria máis”.
A seguinte proba será o xoves 17, ás 20:30 horas, para recuperar o encontro da primeira xornada ante o Maristas Coruña. Dous días despois, enfróntanse ante otro galego, o BAXI Ferrol, líder invicto da LF2.
FICHA TÉCNICA
61) ULLA OIL ROSALÍA: Carla García (11), Nuria Chorén (2), Blanca Manivesa, Sarai Carro (15) e Leticia Soares (10) -cinco inicial-. Tamén xogaron: Paula Rivas (1), Sara Corredoira (13), Ángela (2), Alba, Clara Riera (5) e Nerea Liste (2)
68) OSÉS CONSTRUCCIÓN ARDOI: Diana Cabrera (14), Amaya Gastaminza (11), Tamara Montero (8), Iranzu Echeverría (4) e Itziar Arregui (2) -cinco iniciail-. Tamén xogaron: Paula Marcos, Eva Cases (9), Alazne Vicente, Ayela (12), Andrea Tollar e Josephine de Barros (8).
PARCIAIS: 22-25, 13-8, 9-17 e 17-18.
ÁRBITROS: Álvarez Ossorio e Martínez Covelo
INCIDENCIAS: Partido correspondente á duodécima xornada da Liga Feminina 2 disputado no Instituto Rosalía (Santiago de Compostela).
