Nesta 15ª xornada de Liga Feminina 2 e segunda da segunda volta, todos os equipos galegos terán un rival irmandiño enfronte. Os primeiros en disputar o seu encontro serán Ulla Oil Rosalía e Celta Zorka Recalvi, na pista do Instituto Rosalía, o sábado, 9 de xaneiro, ás 17:00 horas.
Ambos conxuntos chegan con dous traxectorias moi dispares e con obxectivos distintos para esta tempada. As locais están na loita pola permanencia e intentando transformar as boas sensacións en vitorias. As visitantes aspiran a xogar o ascenso e queren volver ao alto da táboa.
Por iso, para Rosalía e Celta precisan sumar dous puntos para superar aos seus rivais directos na clasificación. Sobre o papel, as celestes chegan en mellor posición. Con dez vitorias e catro derrotas, só dous puntos separan ás de Vigo do segundo clasificado, o Osés Construcción Ardoi.
Precisamente, as navarras foron as rivais coas que comezou o declive das viguesas, que perderon entón a posición de prata, que aínda non recuperaron. Unha derrota na seguinte xornada, contra o BAXI Ferrol, acentuou máis a baixada de postos. Con todo, as celestes seguen na cabeza da táboa debido ás dúas seguintes vitorias contra Maristas Coruña e Ibaizabal.
Pola súa banda, as compostelás están a ter dificultades para alonxarse da cola da clasificación, especialmente pola racha de catro derrotas consecutivas, a segunda peor da categoría despois da do colista, o Magec Tías.
Este será o cuarto partido galego que disputen consecutivamente as xogadoras de Chiqui Barros. Dos tres últimos partidos, dous foron contra o Maristas Coruña, cun saldo dunha vitoria e unha derrota. O outro, contra o invicto, o BAXI Ferrol.
Cara a cara de anotadoras no Rosalía-Celta
Este sábado poderá verse sobre o parqué do Rosalía un duelo entre dous das mellores anotadoras da LF2. Trátase da local Leticia Soares e da visitante Celia García. Ambas teñen unha media de anotación moi similar, de 13,25 puntos a primeira e 13,14 a segunda, sendo as dúas as mellores fronte ao aro nos seus conxuntos.
Ademais, tanto Soares como García foron a MVP do Rosalía e Celta respectivamente na anterior xornada. A brasileña levou o peso do partido ao seu lombo, logrando anotar case a metade dos puntos do seu equipo e cun acerto do 75% desde o tiro libre. Pola súa parte, a española logrou once rebotes e dez puntos, que guiaron ás celestes á vitoria.
Pero este non é o único cara a cara que se poderá ver no partido. Clara Riera, das compostelás e Mariona Martín, das viguesas, tamén compiten entre as mellores anotadoras desde a liña de 6,75 metros, ocupando o cuarto e terceiro posto respectivamente no ránking.
Este sábado recibimos al @Celtabaloncesto, seguimos jugando a puerta cerrada, pero podeis seguirlo en directo aqui: https://t.co/Yr2tO0NE26@deporte_galego @fdeportegal @CompeticionFEB @SomosABANCA @FGB_Baloncesto @dxtSan @PazodeRaxoi#VamosRosa #LF2 pic.twitter.com/gJ7JdFkjkG
— Rosalia FEDESA (@RosaliaFEDESA) January 7, 2021
