A Liga Feminina 2 remata en Galicia para as deportistas galegas do Ulla Oil Rosalía e BAXI Ferrol, que se citan para medir forzas entre si na cancha do Instituto Rosalía en Santiago de Compostela. Alí van disputar a última xornada da primeira fase. O encontro, un duelo galego que enfronta as líderes coas penúltimas clasificadas, terá lugar este sábado, 27 de marzo, ás 19:00 horas na capital galega.
O conxunto visitante, o cadro universitario ferrolán, agarda rematar en terras galegas unha tempada de 10, na que levan un pleno de vitorias. Sobre o papel todo semella que contra o Ulla Oil Rosalía FEDESA as ferrolás sumaran a vitoria consecutiva número 26. As compostelás están moi alonxadas na táboa das da cidade departamental. Pero tamén a tranquilidade de saberse salvadas e a confianza de xogar na casa, poden facer que as santiaguesas dean a sorpresa.
“Chegados a este punto, sería bonito rematar a competición gañando todos os partidos”, admite o adestrador, Lino López. Con todo, recorda que o importante é avanzar e “chegar no mellor estado posible á fase de ascenso”.
Este será, en palabras do adestrador axudante do equipo de Santiago de Compostela, Jesús Montero, “un partido para desfrutar, seguir competindo e cumprindo obxectivos a longo prazo”. O Ulla Oil Rosalía chega na penúltima posición, tras unha dura primeira tempada militando na Liga Femenina 2, pero coa “tranquilidade de ter conseguido o obxectivo de salvarnos”.
Irene Gari vai ser baixa nas filas do BAXI Ferrol
O cadro visitante viaxa á capital galega cunha baixa nas súas filas. O adestrador, Lino López, non poderá contar nesta ocasión con Irene Gari. A deportista está a recuperarse dunha microrrotura fibrilar nun xemelgo, froito dunha lesión acontecida na pasada fin de semana.
O resto das xogadoras do BAXI Ferrol estarán á disposición do seu adestrador para este partido final.
Irene Gari tiene una microrrotura de fibras en el gemelo, sufrida en el calentamiento del partido del sábado.
Irene se encuentra en tratamiento por los servicios médicos del club y su vuelta a las canchas dependerá de la evolución de la lesión.
Ánimo @IreneGari 🤞 pic.twitter.com/RQ15LJmtoo
— Baxi Ferrol (@UniFerrol) March 23, 2021
Duelo de forzas desiguais
No equipo local son conscientes do alto nivel do seu rival nesta última xornada. Montero asegura que o BAXI Ferrol é un equipo “deseñado para ascender a Liga Feminina e que ten superioridade física e que, aínda que estea pensando na segunda fase, vai saír a gañar o partido”.
Jesús Montero, Ulla Oil Rosalía FEDESA: “O BAXI é un equipo deseñado para ascender a Liga Feminina”
As ferrolás, sendo o equipo máis anotador desde a liña de tres, son tamén un bloque que acerta lonxe do aro e que en defensa xoga cun “bloqueo agresivo, dous contra un dentro da pista”, segundo o adestrador axudante compostelán. Por iso o preparador, Jesús Montero admite que este é “un partido difícil que imos competir e intentar gañar”.
Pola súa parte, Lino López, adestrador do BAXI Ferrol, considera que o seu equipo aínda ten aspectos a mellorar e que “ante o Celta demostramos que estamos nun bo momento físico e de xogo, pero quedan cousas por mellorar e imos tratar de que se reflicta o traballo neste encontro”.
Lino López, entrenador do BAXI Ferrol: “Quedan cousas por mellorar e imos tratar de que se reflicta o traballo neste encontro”
Pase o que pase, este será un partido ilusionante para as xogadoras brancas. A número 12, Marta López, asegura que “afrontamos o último partido de Liga con moita ilusión xa que é o último dunha gran tempada e esperamos acabar con moi boas sensacións”.
O encontro, como vén sendo habitual, poderá seguirse en vivo vía streaming a través do Canal FEB.
