Este mércores, ás 21:00 horas no IES Rosalía de Santiago de Compostela, celebrarase o encontro entre o Ulla Oil Rosalía e o CB Arxil, correspondente á cuarta xornada de Liga Feminina 2. O partido tivera que ser adiado no seu día polo illamento das xogadoras do clube compostelán.
Ningún dos dous equipos está a asinar unha boa tempada. As locais soamente puideron xogar tres partidos das seis xornadas que se celebraron xá la LF2, dos cales non gañaron ningún, relegándoas a ser colistas na táboa. As visitantes veñen cunha racha de tres derrotas consecutivas contra tres galegos (ante o Celta Zorka Recalvi, Baxi Ferrol e AD Cortegada) dos catro encontros que puideron disputar.
Un Rosalía novato pero con ilusión
As xogadora do Ulla Oil Rosalía non tiveron o debut en casa esperado. A tempada anterior o equipo santiagués atopábase no primeiro posto da clasificación no seu grupo de 1ª Nacional no momento no que se suspendeu a competición, motivo polo cal este curso foi invitado a participar no novo formato.
Ás ordes dun adestrador veterán como é Chiqui Barros está un equipo formado por xogadoras novatas na Liga Feminina 2, a maioría delas xóvenes galegas que se atopan en Santiago por estudos ou xogadoras da propia canteira. O único reforzo deste conxunto é Leticia Soares, pívot brasileña que aporta ao equipo a súa presencia física.
O Arxil contará de novo con Margarita Moreira
Pola súa banda, o CB Arxil está a aprender dos seus erros e neste novo encontro buscarán saír con maior tensión para lograr puntuar. O adestrador, Lino Vázquez, admite que está a ser unha Liga complicada. Os protocolos COVID-19 están a influír nos adestramentos, e o adiamento de diversos encontros tampouco axuda a acadar o ritmo dunha competición cun novo sistema.
Esta tempada soamente ascenderán dous conxuntos e para o próximo ano crearase unha liga intermedia, polo que non clasificarse nas primeiras posicións do grupo implica na práctica un cambio de categoría para 28 dos 42 equipos.
Para esta semana, decisiva para as de Pontevedra, regresa á pista Margarita Moreira, que poderá xogar fronte ao Rosalía e tamén contra o Extremadura Miralvalle Plasenc, ao que se enfrontará o próximo sábado, 14 de novembro.
Este duelo de rivalidade entre galegas tería que terse disputado o pasado 24 de outubro, pero a detección de dous falsos positivos no Ulla Oil Rosalía fixo que ambos clubes acordasen adiar o encontro. Porén, agora, as restricións sanitarias debidas á pandemia por COVID-19 obrigan a disputar este partido entre clubs da nosa comunidade a porta pechada, aínda que as afeccións poderán ver en directo o partido na web do conxunto local: www.rosaliafedesa.es
— Rosalia FEDESA (@RosaliaFEDESA) November 8, 2020
