A medallista paraolímpica Susana Rodríguez Gacio será a próxima invitada do programa Estirando el Chicle.
O podcast da tamén galega Carolina Iglesias e Victoria Martin invitou á viguesa para falar de “facer posible o imposible” e nas primeiras declaracións compartidas a través das redes sociais do programa, Rodríguez Gacio avanzou o que sentiu ao gañar a medalla de Ouro nos últimos Xogos de Tokio 2020.
“É a hostia, e que non o podes imaxinar ata que o vives“, declara a triatleta, e engade que “é o que soñas cando fas deporte, o máis que podes pensar facer é gañar os Xogos”. Ademais, declarou que a medalla lle servirá para mirar atrás nos momentos malos e valorar o que ten conseguido.
Campeona olímpica de triatlón y médica, la invitada de esta semana a Estirando el chicle nos gana en absolutamente todo, y eso que tenemos un Ondas 💪 @SuRGAcio viene a hablar de deporte y nosotras nos quejamos de saltar el potro en Ed.Física. El viernes en @PodiumPodcast 🏃♀️ pic.twitter.com/s79VfAwRZK
— Estirando el chicle (@EstirandoChicle) March 9, 2022
Logros persoais
Os logros do deporte non son os únicos nos que se fixarán as coñecidas como “Tronchi e Monchi”. As presentadoras de Estirando el chicle tamén lle preguntarán a Rodríguez Gacio pola súa carreira como médica.
Neste sentido, a deportista explica que a súa intención era estudiar Medicina, pero polo seu problema de visión desanimárona e decantouse por Fisioterapia. Cando estaba á metade dos seus estudios decidiu intentalo igualmente e hoxe é doutora especialista en Medicina Física e Rehabilitación.
Coñeces Estirando el chicle?
O programa feminista Estirando el chicle, que xa ten conseguido dous premios Ondas e recibido no seu estudio a outras deportistas como a futbolista Virgina Torrecilla, emitirá a entrevista completa en Podiumpodcast este venres, 11 de marzo, e o domingo 13 poderá verse na súa canle de Youtube.
