Rocío Tasende: “Sabemos que vai ser duro o cambio de categoría, pero a este equipo sóbranlle ganas”

Rocío Tasende Rama (25 de novembro de 1998 – Santa Comba, A Coruña) cumprirá a súa quinta tempada no 5 Coruña Futbol Sala. A deportista é consciente do salto de categoría que se vivirá no club coruñés pero confía no bloque: “Sabemos que vai ser duro o cambio de categoría, pero a este equipo sóbranlle ganas”.

A xogadora, que foi evolucionando co paso das tempadas ata converterse nunha das pezas indispensables para a súa adestradora do 5 Coruña Futbol Sala, Fani Martínez, seguirá vinculada un ano máis á entidade rojilla. Para a futbolista a sensación que lle deixa a pasada tempada, é que viviu unha tempada moi intensa a nivel emocional, que finalizou co mellor desenlace posible.

“Foi unha tempada de tolos, párome a pensar en todo o que conseguimos e fáilleme imposible non emocionarme. A clave estivo sen ningunha dúbida no equipo que formamos, a piña que se formou fixo que ata nos momentos máis complicados soubésemos saír adiante e loitar ata o último segundo tirando unhas doutras, co resultado de lograr un ascenso que na miña opinión foi merecedor despois de todo o traballo que houbo detrás”, explica a deportista do 5 Coruña Fútbol Sala sobre a gran campaña realizada polas futbolistas o pasado curso ás ordes de Fani Martínez.

Rocío Tasende, futbolista do 5 Coruña Futbol Sala: “A clave da pasada tempada estivo sen ningunha dúbida no equipo que formamos, a piña que se formou fixo que ata nos momentos máis complicados soubésemos saír adiante e loitar ata o último segundo tirando unhas doutras, co resultado de lograr un ascenso”

Á hora de afrontar a súa renovación co club, segundo informan desde a entidade coruñesa, a de Santa Comba sempre o tivo claro. Quería cumprir a súa quinta tempada e gozar coas súas compañeiras da categoría nacional que tanto lles custou conseguir. “O grupo humano que se formou este ano fai que a decisión de renovar fose moi clara, quero seguir aprendendo e gozando á beira das miñas compañeiras e o meu corpo técnico que sen dúbida fan que me enganche e viva o fútbol sala dunha maneira inexplicable”, manifesta Rocío Tasende. 

Rocío Tasende cara ao curso 2021-22: “Loitaremos pola permanencia”

Como o resto das súas compañeiras de equipo as expectativas para a tempada 2021/2022 son elevadas, pero sobre todo ilusionantes. Partindo dunha base firme que é a de seguir crecendo colectivamente e individualmente. “Todas sabemos que vai ser duro o cambio de categoría, pero a este equipo sóbranlle ganas para seguir traballando cada día e seguir aprendendo, se seguimos mantendo a piña que temos vai facer que todas rememos na mesma dirección e vaiamos conseguindo logros aos poucos. Tentaremos loitar pola permanencia pero sempre gozando do que facemos”.

Rocío Tasende, futbolista do 5 Coruña Futbol Sala: “Se seguimos mantendo a piña que temos vai facer que todas rememos na mesma dirección e vaiamos conseguindo logros aos poucos. Tentaremos loitar pola permanencia pero sempre gozando do que facemos”