- Unha vez máis apreciouse as gañas que teñen as e os nosos deportistas de competir, cunha altísima inscrición
Esta fin de semana o Concello de Ribeira acolle os Campionatos de taekwondo para as categorías cadete e Sub-21. A cita deportiva contou cunha altísima inscrición que da conta ansia por competir que teñen as e os deportistas galegos.
Conta desde Federación Galega de Taekwondo: “dende que reanudamos as competicións no mes de marzo é algo que se repite: A alta inscrición, que amosa ás gañas que teñen os nosos deportistas de competir. Esta fin de semana celebrarase no Pavillón Alcalde Torres Colomer de Palmeira (Ribeira) o Campionato Galego de Combate das categorías cadete e sub 21”.
Hoxe, sábado 5 de xuño, a partir das 09:00 horas, disputarase o Campionato Cadete cun total de 132 deportistas inscritos. O reparto entre xéneros nesta proba que se celebra en Ribeira é o seguinte: 80 homes e 52 mulleres.
E mañá, domingo 6 de xuño será o momento do campionato Sub-21, no que participarán 80 taekwondistas repartidos do seguinte xeito: 44 na categoría masculina e 36 na feminina.
Este torneo que acolle o Concello de Ribeira será decisivo para confeccionar a lista de seleccionados por parte galega para o Campionato de España.
A organización corre por conta do Natural Sport Ribeira e a Federación
O torneo é organizado polo club Natural Sport Ribeira en colaboración coa Federación Galega de Taekwondo.
Nesta cita deportiva, como non podería ser doutro xeito, as medidas de protección anti COVID-19 para previr posibles transmisións do coronavirus marcarán o desenvolvemento da proba. Por exemplo, todas as persoas participantes no torneo realizarán o día antes, na pesada, un test de antíxenos para confirmar que non son positivos.
Entre as medidas está que a competición se celebrará a porta pechada por decisión da organización para restrinxir ao máximo as posibilidades de contaxio. Diante desa decisión de non abrir as portas ao público, o evento será retransmitido pola canle de youtube da Federación Galega.
