A Real Federación Galega de Fútbol (RFGF) está a escoitar a todos os clubs do fútbol galego. Co seu presidente Rafael Louzán e os membros da Xunta Directiva, segue traballando a diario e mantén un contacto moi estreito con todos os clubs de Galicia mediante unha serie de encontros telemáticos cos responsables das diferentes entidades deportivas.
O obxectivo destas reunións é coñecer como están a xestionar os clubs a situación creada polo parón competitivo, ademais das súas ideas e suxerencias en todos os ámbitos, pero principalmente desde o punto de vista competitivo tendo en conta a situación de excepcionalidade.
Coñecer de primeira man o sentir do fútbol feminino galego
A Federación tamén quixo coñecer de primeira man o sentir do fútbol feminino tras as videoconferencias que mantivo a pasada semana cos representantes na Liga Iberdrola e Reto Iberdrola, Primeira Nacional Feminina e Primeira Galega. Hoxe mércores, Louzán e a Xunta Directiva reuniranse cos clubs da Segunda Galega.
A RFGF puxo en marcha hai uns días as reunións cos clubs das distintas categorías, comezando cos catro equipos galegos da Segunda División B. De igual modo xa o fixo con todos os clubs galegos de Terceira División (20), Preferente (40) e Primeira Galicia (90), e esta semana continuará a rolda de contactos coas entidades da Segunda e Terceira Galicia (unhas 400 en total).
Durante estes encontros telemáticos o presidente Rafael Louzán presentou un informe do presidente e púxose sobre a mesa a situación das distintas competicións federativas. De igual modo analizouse a situación dos adestradores e xogadores, escoitando as necesidades dos clubs.
A RFGF deixa claro que a prioridade é a saúde
Como no resto de competicións, a pandemia mundial supuxo o paro indefinido das competicións federadas así como as eliminatorias de Copa. A Federación deixa claro que a prioridade absoluta agora mesmo é a saúde e ante as dúbidas dos clubs móstrase aberta a escoitar as diferentes propostas para o futuro da competición.
Fútbol Sala e Fútbol Veterano
A Real Federación Galega de Fútbol tamén tomou boa nota das suxerencias de todos os equipos das categorías nacionais de fútbol sala: Primeira e Segunda División femininas e ademais da Primeira, Segunda, Segunda División B e Terceira masculinas e a División de Honra Xuvenil. Na folla de ruta da RFGF tamén está prevista unha xuntanza telemática cos clubs da Preferente de fútbol sala.
Cómpre salientar que tamén está previsto reunirse cos equipos que integran a competición de Fútbol Veterano.
A Federación está a estudar todas as posibilidades e propostas co obxectivo de tomar a mellor decisión posible, pero sen ter présa porque recordan que a prioridade segue sendo a saúde e gañarlle a batalla ao coronavirus.
