Os distintos plans de competición deseñados pola dirección deportiva da Real Federación Galega de Fútbol (RFGF) neste retorno á competición tras nove meses de parón pola COVID-19 seguen as premisas básicas de adaptación a unha situación totalmente especial.
Trátase duns “plans adaptados a unha tempada curta, pero ao mesmo tempo buscando a competitividade e ligas atractivas para todos. Uns plans adaptados tamén á realidade económica dos clubs, de aí que se aposte pola división en máis grupos dos habituais e seguindo o criterio xeográfico para esa distribución. E uns plans homoxéneos tratando de manter o mesmo modelo en todas as competicións, sempre e cando sexa posible”, argumentan desde a federación galega.
Na competición a RFGF evita play offs
Relatan desde a RFGF que se tratou de “evitar todo tipo de play offs ou fases de ascenso para non repetir situacións como as da tempada pasada, asegurando deste xeito os efectos clasificatorios sempre que se dispute un mínimo da competición, tal e como se vai reflectir nas distintas circulares.
Teñen tamén presente na Federación Galega de Fútbol, que pode haber equipos que non desexen competir e por ese motivo explican: “dado que esta é unha tempada claramente atípica e que a situación pode motivar a lexítima decisión de non participar por parte dalgún equipo, a Real Federación Galega de Fútbol (RFGF) entende que resulta imprescindible abrir un prazo de confirmación da participación nas distintas categorías para así poder definir os plans competicionais de maneira segura e que non se vexan afectados ao longo da tempada”
