Segundo informa a RFGF, esta entidade e o Instituto INIBIC do CHUAC (Complexo Complexo Hospitalario Universitario A Coruña) poñen en marcha un estudo para coñecer a incidencia da infección da COVID-19 nos menores de 18 anos que practican deporte.
A Real Federación Galega de Fútbol explica que “ten un compromiso claro coa saúde dos futbolistas federados en Galicia, e máis nestes momentos nos que sufrimos a permanente ameaza do coronavirus”.
Neste sentido, en colaboración co Instituto de Investigación Biomédica da Coruña (INIBIC) pertencente ao CHUAC, a Real Federación Galega de Fútbol participará na realización “dun estudo co obxectivo de determinar a incidencia de infección por SARS- COV-2 en nenos e nenas de 18 anos e menores desa idade que practican deporte federado en clubs de fútbol base da comunidade autónoma”.
Tal e como explica a RFGF “estes datos serán recollidos a través das Delegacións Territoriais federativas, e permitirán a súa comparación coa incidencia global da enfermidade nestes grupos de idade en Galicia, o que permitirá confirmar se a frecuencia da enfermidade é maior ou menor neste contexto”.
Desde a RFGF considera que é “un estudo moi importante” e por iso solicitan “a colaboración de todos os clubs para que o INIBIC poida realizar este importante traballo, demostrando unha vez máis a implicación e o compromiso social do noso deporte”.
