Segundo informa a Real Federación Galega de Fútbol (RFGF), a entidade escoitou ao longo das últimas semanas a máis de 900 clubs de fútbol e fútbol sala de Galicia. A Federación fala dun “exercicio de transparencia sen precedentes” no que se levaron a cabo “máis de 20 encontros telemáticos”.
A Real Federación Galega que Fútbol que dirixe Rafael Louzán resalta nun comunicado que “volveu demostrar que está máis preto dos clubs que nunca. Nun exercicio de transparencia sen precedentes no balompé autonómico, a Federación deu voz a practicamente todos os clubs galegos do fútbol semiprofesional e afeccionado”.
Explican desde a entidade que, durante as últimas dúas semanas, a Xunta Directiva encabezada polo presidente Louzán, mantivo máis de 15 encontros telemáticos nos que deu voz aos 4 representantes galegos na Segunda División B, aos 20 clubs de Terceira, aos 40 da Preferente, aos 90 da Primeira Galicia e aos máis de 380 da Segunda e Terceira Galicia das sete delegacións e subdelegacións federativas (A Coruña, Ferrol, A Costa, Lugo, Ourense, Pontevedra, Santiago e Vigo). Tamén a todo o fútbol feminino e a más de 100 clubs de fútbol sala.
En total, máis de 900 clubs son os que asistiron a todas estas reunións, as cales tiveron un “éxito absoluto de convocatoria e de participación, tendo todos a oportunidade de expresar a súa opinión (un 80% de asistencia ás convocatorias)”, sinalan desde a RFGF.
O obxectivo destas reunións non era outro que coñecer como están a xestionar os clubs a situación creada polo parón competitivo, ademais das súas ideas e suxerencias en todos os ámbitos, pero principalmente desde o punto de vista competicional tendo en conta a situación de excepcionalidade.
A RFGF falou cos clubs do fútbol femenino
Ademais, a Federación tamén coñeceu de primeira man o sentir do fútbol feminino tras as videoconferencias que mantivo cos nosos representantes na Liga Iberdrola e Reto Iberdrola, Primeira Nacional Feminina e Primeira e Segunda Galega.
A Real Federación Galega de Fútbol tamén tomou boa nota das suxerencias de todos os equipos das categorías nacionais de fútbol sala: Primeira, Segunda, Segunda División B e Terceira masculinas, ademáis da Preferente; Primeira e Segunda División femininas e a División de Honra Xuvenil. En total, o ente federativo escoitou a máis de 100 clubs de fútbol sala.
Nos vindeiros días tamén se programarán reunións cos clubs de fútbol sala das ligas locais para así escoitar a todos e cada un dos clubs da especialidade.
Cómpre salientar que a Xunta Directiva da RFGF tamén ten intención de reunirse nas vindeiras semanas con todos os clubs de Fútbol Veterano. Xa o fixo con algúns da Delegación de Pontevedra e tamén o fará con todos os demais.
Escoitáronse propostas de cara ao futuro da competición
Durante estes encontros telemáticos o presidente Rafael Louzán presentou un informe e púxose sobre a mesa a situación das distintas competicións federativas. De igual modo analizouse a situación dos adestradores e xogadores, escoitando as necesidades dos clubs.
Como no resto de competicións, a pandemia mundial supuxo o paro indefinido das competicións federadas así como as eliminatorias de Copa. A Federación deixa claro que a prioridade absoluta agora mesmo é a saúde e ante as dúbidas dos clubs móstrase aberta a escoitar as diferentes propostas para o futuro da competición. Enriba da mesa varias posibilidades sobre as que se pronunciaron os clubs: anulación total da tempada invalidando as clasificacións; reiniciar a tempada cando existan garantías sanitarias e dar por finalizada a competición dando validez ás clasificacións existentes a 14 de marzo (momento no que se decretou o estado de alarma) aplicando os ascensos estipulados, pero non os descensos.
Comisión Deportiva
A Comisión Deportiva da RFGF continúa traballando durante as últimas semanas co obxectivo de analizar a situación competicional derivada pola pandemia. Dita Comisión, da que forman parte os membros do departamento de Competición e a Dirección Deportiva da Federación, xa estableceu unha folla de roteiro e contempla varios escenarios para dar solución a esta complexa situación deportiva en canto a RFEF adopte a decisión definitiva. Unha decisión global para todo o fútbol 11 galego tratando de ser o máis xustos posibles nunha situación claramente excepcional na que resulta imposible dar coa solución perfecta.
Influencia da decisión da RFEF
A Federación está a estudar “todas as posibilidades e propostas co obxectivo de tomar a mellor decisión posible sempre tendo en conta a decisión final que adopte a Real Federación Española de Fútbol, pois o que se faga nas categorías nacionais ten influencia sobre as autonómicas”.
“Todo elo sendo moi conscientes de que a prioridade é a saúde e cumprir coas recomendacións das autoridades sanitarias”, apuntan desde a Federación Galega. Por iso, a Xunta Directiva está “en permanente contacto coas autoridades e xa mantivo tamén varios encontros con especialistas ben coñecedores dunha situación de pandemia como a que estamos a vivir. Polo momento son moitas as incógnitas que se irán disipando co paso das semanas, polo que solicitamos prudencia a todos e seguir loitando por gañarlle a batalla ao COVID-19″, explica a Federación.
