Galicia conta con catro representantes na nova Xunta Directiva da RFEVB, dúas son mulleres. Trátase das presidentas do CV Arenal Emevé Lugo, Bibí Bouza, e Voley Playa Milenio Ourense, Patricia González.
O Presidente da Real Federación Española de Voleibol (RFEVB), Agustín Martín Santos, fixo oficial estes días os nomeamentos dos membros da nova Xunta Directiva para o seu sexto mandato consecutivo no máximo organismo do voleibol nacional, segundo informa a Federación Galega de Voleibol.
Despois de ser recentemente reelixido nas eleccións con máis participación da historia da RFEVB, que tiveron lugar o pasado mes de decembro en Madrid, Agustín Martín Santos reforza así a súa confianza no voleibol galego, incrementando a súa representación con catro membros da nosa comunidade, un fito sen precedentes e que premia o esforzo e o gran traballo que están a desempeñar clubs e directivos en Galicia.
Así foron nomeados María Concepción Bibi Bouza Betríu, (presidenta do Club Emevé de Lugo), Uxío García Lamas (presidente do Club Aldebarán de San Sadurniño) e Patricia González Fernández (presidenta do Club Voley Playa Milenio Ourense) como vogais da Xunta Directiva da RFEVB para os próximos catro anos.
O presidente da galega, vicepresidente da RFEVB
Do mesmo xeito, o actual presidente da Federación Galega de Voleibol, José Ángel Luna Bargo, foi nomeado como novo vicepresidente da federación estatal, o que completa un equipo con máis acento galego que nunca no órgano de goberno da federación nacional.
“O noso volei pasa a ter así unha gran presenza na cúpula da RFEVB, aportando experiencia na xestión deportiva e participando activamente na toma de decisións sobre o voleibol nacional, velando polo seu correcto desenvolvemento tanto na modalidade de pista como na de praia”, destacan desde a Federación Galega de Voleibol .
Dende a Federación Galega de Voleibol felicitan “as persoas nomeadas” as que lles desexan “mellor das sortes nas súa labor ao fronte do voleibol español”.
