O HC Deportivo Liceo comunicaba á RFEP tres positivos por COVID-19 nas súas filas e solicitaba adiar o partido previsto para mañá co PHC Sant Cugat. Segundo informa o club verdibranco, a Federación rexeitou a súa petición xa que o protocolo da entidade cifra en catro o número de positivos que premite suspender un encontro.
Tras a decisión da RFEP o guión mantense e, polo de agora, o HC Deportivo Liceo xogará co Sant Cugat mañá domingo 16 de xaneiro ás 11:15 horas.
A decisión da Federación Española de Patinaxe (RFEP) non gustou no club herculino que explica en nota de prensa que ese protocolo que cifra en catro os positivos para adiar un encontro “non ten en conta o feito de que o resto de compañeiras de equipo son contactos estreitos que poden resultar nun brote maior”.
Lembran desde o HC Deportivo Liceo, que “a normativa da Xunta de Galicia recomenda que estos contactos minimicen a súa actividade social para evitar posibles novos contaxios”
Advirte o club galego que as xogadoras liceístas “pasarán mañá pola mañá unha nova serie de tests”, salientado que se trata dunhas probas ás que “non están obrigadas”.
Desde o HC Deportivo Liceo manifestan non entender “este risco evitable que poría en perigo non so ao Deportivo Liceo, se non tamén ao HCP Sant Cugat“. Nesta liña, o club verdibranco expón en nota de prensa: “Lamentamos profundamente que a RFEP priorice o deportivo por encima da saúde tras estos difíciles dous anos de pandemia”.
Non acudir a Mataró nunha situación similar custoulle ao Liceo un 10-0
Na sétima xornada o HC Deportivo Liceo non acudira a xogar contra o Lidergrip Mataró ao detectar un positivo por COVID-19 no club que foi contacto directo de membros do staff do equipo da Ok Liga Feminina. Segundo explicaba o equipo liceísta daquela “non se pode confirmar a existencia de máis contactos estreitos”.
O caso ocorría hai aproximadamente un mes. Daquela o HC Deportivo Liceo sinalaba: “Sería unha auténtica irresponsabilidade enviar a una expedición de xogadoras que neste momento non son oficialmente positivas en COVID-19, pero que poderían selo no momento de coñecer os resultados dos tests. O HC Deportivo Liceo négase rotundamente a repetir os errores doutros clubes que, no verán de 2020, si cometeron esa temeridade e fixeron dano á cidade da Coruña. É unha lóxica cuestión de saúde, tanto propia como allea”.
Aquela ausencia foi considerada incomparecencia por parte da FFEP das verdibrancas ás que se lles deu por perdido o partido por 10-0.
Matinal de hoquei en Riazor co HC Liceo recibindo ao Sant Cugat na xornada 10 da Ok Liga
