A Real Federación Española de Fútbol (RFEF) vén de publicar o protocolo reforzado de actuación para a volta das competicións oficiais de ámbito estatal e carácter non profesional para a tempada 2020/2021.
Segundo informa a Real Federación Galega de Fútbol, no marco da actual pandemia de COVID-19 e a nova normalidade que seguiu ás etapas de confinamento e desescalada durante os anos 2020 e 2021, este protocolo establece un marco xeral relativo aos procedementos médicos, sanitarios e hixiénicos, así como os protocolos operativos que deben aplicarse na organización das competicións oficiais de ámbito estatal e de carácter non profesional da Real Federación Española de Fútbol.
Para minimizar ese risco nas competicións que están baixo a tutela da RFEF e que se desenvolven nas CC.AA. requírese dun Protocolo de mínimos claros, pero tamén é imprescindible que os participantes no desenvolvemento das competicións de fútbol e fútbol sala respecten estritamente todas as recomendacións, instrucións e precaucións establecidas neste documento, así como as boas prácticas estándar recomendadas.
A RFEF pide “dar exemplo na aplicación rigorosa das medidas”
No documento, a RFEF salienta que “as e os futbolistas, adestradoras/es, árbitras/os, auxiliares e demais persoal que participa na organización dos campionatos de fútbol e fútbol sala deben lembrar que as súas accións, e en particular, o cumprimento dos requisitos de distanciamento social, non só garanten unha contorna segura nestas competicións, senón que tamén permiten o desenvolvemento normalizado das mesmas. Todos os membros da RFEF teñen o deber colectivo de mostrar o seu liderado e de dar exemplo na aplicación rigorosa destas medidas”.
Respecto ás normas de cada comunidade autónoma
Neste protocolo, a RFEF advirte que “é competencia dos Gobernos Autonómicos en coordinación coas autoridades locais pertinentes, fixar os requisitos e protocolos para o uso dos equipamentos deportivos e a realización dos adestramentos de forma segura. Corresponde ás autoridades competentes a fixación das condicións de seguridade adecuadas para que os cidadáns poidan realizar a práctica deportiva de forma segura e os deportistas federados poidan realizar os adestramentos correspondentes. Cada unha das Comunidades Autónomas ha ditado normas específicas sobre a práctica deportiva federada que deben cumprirse e respectarse”.
Advirte a RFEF que o documento, “como non pode ser doutra maneira, estará suxeito e será subsidiario de calquera normativa que, con carácter xeral ou específica, poidan ditar tanto o Goberno central como as CC.AA., xa sexa para o conxunto das actividades deportivas, ou para as competicións deportivas organizadas polas FFDDEE”.
Un protocolo condicionado á evolución da pandemia
Como non podía ser doutro xeito, desde a RFEF aclárase que “a vixencia, material e temporal, deste Protocolo quedará sempre condicionada á evolución da pandemia, podendo en consecuencia sufrir cambios, de alcance nacional ou autonómico, segundo os casos, que serán propostos polo CSD (Consejo Superior de Deportes) e dos cales esta RFEF (Real Federación Española de Fútbol) fará as adaptacións pertinentes no momento que resulte preciso facelo”.
