A incidencia da pandemia está condicionando todas as competicións, con adiamentos e suspensións, e ás veces sen priorizar a saúde das deportistas. Isto é o que aseguran as futbolistas da Primeira Iberdrola, que lle pediron á Real Federación Española revisar a xestión deste curso da Liga.
Así, esta semana a RFEF reuniuse cos clubs de fútbol da máxima categoría, na Junta de División de la Competición Profesionalizada, para buscar solucións aos aprazamentos de xornadas e estudar o protocolo COVID-19 actual.
Esta xuntanza prodúcese días despois da convocatoria do organismo estatal ás capitás dos equipos de Primeira, o pasado sábado, 30 de xaneiro. Nesta reunión as futbolistas expresaron as súas opinións sobre a xestión actual e propuxeron solucións e melloras respecto ás medidas sanitarias e os adiamentos.
Pola súa parte, a RFEF informou de que todas as xogadoras deben superar semanalmente os test de antíxenos, suministrados grautitamente pola Federación. Ademais, cada club ten un Responsable Médico encargado de informar e firmar que todas as futbolistas poden competir; sen isto o partido non se poderá disputar.
Da mesma forma, a organización asegura que “non suspendeu nin un só partido sen que existira unha orde da autoridade competente ou sen un certificado médico que solicitara a suspensión”. Para a recuperación dos duelos, debe existir un novo certificado do Médico Responsable e ambos equipos deben estar dispoñibles na nova data.
As futbolistas reclaman un protocolo máis esixente
Ante a actual situación sanitaria, as xogadoras da Primeira Iberdrola emitiron un comunicado. Nel priorizan a saúde á competición e expresan a falta de acordos coa RFEF.
Por este motivo, as futbolistas inciden na necesidade de “determinar un protocolo máis concreto, con test e resultados máis controlados e baixo unha normativa que se cumpra a non ser que existan casos límites e excepcionais”.
O texto tamén reza que as deportistas consideran “que é de vital importancia ter un protocolo que nos protexa e sobre todo que se cumpra para poder desenvolver a nosa competición”.
As xogadoras insisten en que non queren solucións “rápidas, senón eficientes, firmes e xustas para os diferentes casos que existan”. Desta forma, propoñen priorizar os partidos adiados da primeira volta e só competir en caso de que ambos conxuntos conten co mínimo de xogadoras dispoñibles.
O comunicado remata solicitándolle á RFEF as modificacións necesarias do protocolo actual e a garantía de que a competición poida levarse a cabo de maneira continua “e evitar así unha liga adulterada e chea de incertidumes”.
“Queremos solucións. Queremos xogar. Queremos fútbol feminino”, rematan as deportistas. Entre elas está a galega e exdeportivista Tere Abelleira, que foi unha das futbolistas que se fixo eco en redes destas reclamacións.
#PrimeraIberdrola #QueremosSoluciones pic.twitter.com/1OHoCbwBkF
— Teresa Abelleira (@teresabelleira) January 30, 2021
A RFEF estuda convertir en obrigatorias algunhas recomendacións
Coñecendo a posición das futbolistas tras emitirse o seu escrito e terse reunido coas capitás na súa representación, a RFEF organizou unha xuntanza cos clubs esta semana.
Nela ambas partes comprometéronse a estudar a posibilidade de convertir algunhas recomendacións en obrigacións. Así mesmo, tendo en conta que o calendario o permite, continuarase recuperando partidos adiados de Liga e Copa.
No marco desta xuntanza, así como na celebrada a semana pasada, a RFEF insiste na “necesidade de ter en conta a prioridade absoluta: a saúde”.
A Federación recorda tamén que o protocolo español “é o máis esixente de Europa, algo fundamental se temos en conta a situación actual do noso país, con máis de 700 mortes diarias causadas pola pandemia”.
Segundo informa o organismo estatal, é posible finalizar a competición programando os duelos aprazados dentro dun “calendario comprimido” e coa posibilidade de “absorber os encontros pendientes”.
Case un 20% dos partidos tiveron que ser adiados
Protocolos aparte, a realidade é que a golpe de febreiro, un 18,5% dos encontros tiveron que ser adiados, xa fora por casos de COVID-19 nos equipos ou polas consecuencias do temporal Filomena.
Na competición regular aínda quedan, sen contar con recuperacións de partidos, 16 xornadas. No caso do Dépor ABANCA 19, ao ter tres duelos pendentes.
Segundo a RFEF, “en total xogáronse o 88,3% de todos os encontros programados ata a data, de tal maneira que en 18 xornadas se disputaron 143 partidos dos 162 que se terían que ter xogado”.
Porén, clubs e Federación, atendendo ás peticións das futbolistas, acordaron evaluar distintas medidas:
- A posibilidade de mobilizar aos filiales cando existan positivos nos equipos principales.
- Pasar as recomendacións a medidas obrigatorias, como a suxerencia de que existan vestiarios distintos para as futbolistas.
- Priorizar os partidos da primeira volta.
- A posibilidade de competir aínda con positivos no plantel flexibilizando o protocolo.
- Implementar unha labor fiscalizadora ou “policial” investigando aos clubs desde a Federación, onde xa existe un procedemento para canalizar denuncias.
Dentro destes puntos, a organización prioriza o relativo a establecer obrigacións no canto de medidas, tendo en conta a situación dos clubs respecto aos seus presupostos e gastos.
Clubs e Federación reuniranse de novo a finales desta semana para poñer en común as conclusións destas propostas e tomar unha decisión cara o futuro da competición.
En palabras da RFEF, “a Federación, xunto aos clubs mostra, desta maneira, actitude dialogante, pero tamén a súa firmeza e rigor para afrontar a competición coa máxima responsabilidade, que non é outra que priorizar, por riba de todo, a saúde”.
Á fin da xuntanza, a directora do Fútbol Feminino, María Tato, e a directora do Departamento Médico da Federación, a doutora Helena Herrero, expresaron as súas valoracións.
