A alcaldesa da Coruña, Inés Rey, presentou a carreira San Silvestre 2023, que se celebrará o domingo 31 de decembro a partir das 10.30 horas. Será a XIV edición que se celebre na cidade. Ao acto asistiron tamén Manuel Vázquez, concelleiro de Deportes; David Iglesias Barca, do Club Rialto e promotor da proba; e Jacinto Torres, presidente da Cocina Económica.
A San Silvestre contará este ano con novidades, como a Cansilvestre, permitíndolle aos corredores participar cos seus cans por primeira vez na historia da proba. Ante o grande éxito de persoas inscritas para esta modalidade, o número de prazas pasou de 100 a 175.
“Desde o Goberno municipal volvemos apostar por unha das probas máis lúdicas e masivas do extenso calendario anual de carreiras que ofrece o Concello”, sinalou Inés Rey.
O prazo de inscrición da San Silvestre está aberto e estenderase ata as 23.59 horas do 26 de decembro, ou ata que se esgoten os dorsais dispoñibles (4.500 dorsais da proba absoluta, 200 das probas infantís, 100 da marcha nórdica e 175 da CanSilvestre).
Este ano haberá Cansilvestre
A Cansilvestre súmase ao resto de modalidades da San Silvestre Coruña que xa conta cun amplo abano de categorías, incluíndo infantís, absolutas, diversidade funcional, disfraces, empresas e marcha nórdica.
Outra novidade é que baixa a idade de participación engadindo unha nova categoría infantil para nenos de 5 e 6 anos.
O último cambio significativo nas modalidades é que os atletas con diversidade funcional contarán con tres categorías específicas, obtendo en todas elas agasallo.
Unha San Silvestre solidaria
A San Silvestre Coruña, que conta co apoio do Concello da Coruña, reafirma este ano o seu compromiso solidario. Ademais de ser unha experiencia deportiva única, a carreira será un evento solidario coa recollida de alimentos non perecedoiros para a Cociña Económica. Os participantes e as persoas asistentes en xeral están convidados a contribuír a mañá do 31 de decembro, e tamén desde hoxe mesmo na sede de Saunier Duval e a partir do do 26 en Decathlon.
Outra iniciativa solidaria na que se volve a involucrar esta proba será “Reis Magos de verdade”, recollendo cartas escritas por nenos, nenas e maiores en situacións desfavorecidas.
Os interesados poderán inscribirse a través da APP oficial gratuíta (San Silvestre Coruña), as webs www.sansilvescoruna.com e www.championchipnorte.com, ou de forma presencial en El Corte Inglés (rúa Ramón y Cajal, 57), ata o 21 de decembro de 2023 ou ata esgotar os dorsais dispoñibles.
