As lucenses do Muralla Galicia Emerging enfróntanse ao líder, o AVIA Eibar Rugby Taldea. Será ás 12:30 horas do domingo 16, coa arbitraxe de Tatiana Yunta. O partido estaba previsto que se disputase en Unbe pero o incendio dun vertedoiro obligou a trasladar o partido a localidade veciña de Arrasate a uns 25 quilómetros de distancia. Ao parecer, como consecuencia do lume no aire hai dioxinas que non fan recomendable a práctica deportiva ao aire libre nos municipios de Zaldibar, Ermua e Eibar.
A diferenza en puntos e, seguramente en xogo, será notable, pero a cita constitúe unha nova oportunidade para as galegas de demostrar que teñen unha ampla posibilidade de mellora, pouco que perder e moito por gañar.
Non cabe dúbida de que a derrota pode ser o resultado máis factible sobre o papel, pero como se colleita ese resultado é o que queda por ver. Soñar con dar a sorpresa é outra posibilidade, lonxana, pero… quen dixo medo?
Jos Portos, técnico do Muralla Galicia Emerging: “Queremos seguir crecendo como equipo, consolidar a melloría en defensa, e o espíritu competitivo, a actitude”
O Muralla Galicia Emerging está adestrado pola parella composta polos técnicos galegos Jos Portos e Rogelio Sabio. O primeiro deles, Portos, consciente das diferenzas que separan ás galegas e do equipo de Eibar, advertía que no rugby “as campanadas a este nivel non son viables”. Por iso, de cara a este partido, o obxectivo que o conxunto lucense leva en mente é “seguir crecendo como equipo, consolidar a melloría en defensa, e o espíritu competitivo, a actitude”.
O Eibar, rival do Muralla, un candidato ao ascenso
Explicaba Jos Portos que o plantexamento do equipo técnico é que cada unha das xogadoras “mellore nun aspecto do xogo, sobre todo na defensa e desfrutar e aprender para o que virá máis adiante”. Sobre o rival, explicaba Jos Portos que son conscientes de que o AVIA Eibar Rugby Taldea “é un equipo pensado para ascender. Terán que corroboralo. Pero nós estamos moi lonxe do seu nivel”.
Jos Portos, técnico do Muralla Galicia Emerging: “A principio de tempada as xogadoras apuntaron nunha libreta un obxectivo individual e outro de grupo”
Nas tareas que as deportistas do Muralla Galicia Emerging teñen por diante hai retos individuais e retos grupais. O propio técnico das lucenses explicaba que entre das dinámicas de grupo que se fixeron no Muralla estaba “apuntar a principio de tempada nunha libreta un obxectivo individual e outro de grupo”. Hai parte desas metas que se puxeron en común e outras que aínda as ten na cabeza so cada xogadora, son un segredo. Facendo así unha autocrítica construtiva que permita medrar ao grupo desde a aprendizaxe individual. Trátase de “marcarse pequenos obxectivos para cada unha das xogadoras que, xuntos, sumarán coma un puño”, explica Jos Portos.
Jos Portos, técnico do Muralla Galicia Emerging: “As xogadoras márcanse pequenos obxectivos para cada unha que, xuntos, sumarán coma un puño”
Eibar, outro partido para aprender de cara ao crucial contra Murcia
As galegas que adestra a dupla formada por Jos Portos e Rogelio Sabio, saben que o día que se xogarán o ser ou non ser nesta categoría será, moi probablemente, no último partido de Liga. Será en casa contra o XV Rugby Murcia, o outro candidato á permanencia. Ese cruce vivirase coma unha final en toda regla. Todo o camiño previo servirá ao Muralla Galicia Emerging como preparación para afrontar na mellor forma posible ese trascendental encontro.
Jos Portos, técnico do Muralla Galicia Emerging: “Non descartamos poder pescar algo por aí, pero o partido co Eibar é un partido para aprender. O Hortaleza e o San Cugat tamén serán difíciles. O obxectivo real é chegar ao 8 de marzo e tentar gañar ao Murcia para manter a categoría”
Mirando ao calendario que ten por diante o conxunto de Lugo, o técnico Jos Portos explica: “Non descartamos poder pescar algo por aí, pero o partido co Eibar é un partido para aprender. O Hortaleza e o San Cugat tamén serán difíciles. O obxectivo real é chegar ao 8 de marzo e tentar gañar ao Murcia para manter a categoría”.
