Nova xornada de contrastes para os equipos galegos na Liga Guerreras Iberdrola. O Mecalia Atlético Guardés e o Conservas Orbe Rubensa BM Porriño avanzan unha semana máis no calendario con resultados ben diferentes para os seus intereses.
A Sangriña segue a ser un feudo inexpugnable neste 2022 para as xogadoras adestradas por Jose Ignacio Prades, que sumaron de novo os dous puntos diante do Zuazo, mentras que o Porriño non puido opoñer resistencia algunha fronte ás lideres e actuais campioas da categoría.
O Guardés afiánzase no quinto posto
O Mecalia Atlético Guardés volveuse a atopar coa vitoria o sábado ante o Zubileta Evolution Zuazo, ao que superou nunha infranquable Sangriña. Fíxoo en gran medida grazas a unha brilante segunda metade, na que se resarciu dun feble primeiro acto, que lle valera ao conxunto de Barakaldo para irse por diante ao descanso (8-9). Con estes dous puntos, o sexto triunfo consecutivo no seu feudo, o equipo miñoto segue de cheo dentro da pelexa polos postos europeos.
Non foi fácil, ou polo menos tanto como indica o marcador final. O conxunto local entrou frío á contenda e un equipo da entidade do Zuazo non o perdoa. A antiga porteira do Mecalia, Meriem Ezbida, raiou a gran altura nos primeiros compases e freou en seco o ataque local cun par de paradas de moito mérito.
Entre o bo nivel da meta visitante e a espesura do ataque local, o partido transcorreu entre un ritmo moi baixo durante todo o primeiro acto. As de Barakaldo mantíñanse en todo momento no encontro e mesmo o gobernaban por momentos cunha Magdalena Fernández-Agustí a un nivel moi alto.
Á volta de vestiarios, o conxunto visitante adiantou a liña defensiva en busca dunha reacción, pero as locais, cheas de confianza, reduciron as perdas e deste xeito o acerto cara portería aumentou exponencialmente. Así selou o triunfo o Mecalia Atlético Guardés , que continúa invicto na Sangriña no que vai de 2022 e segue na quinta posición, a tan só tres puntos do Costa del Sol Málaga, pero cun partido menos: o derbi adiado.
🔝 Un parcial de 7-0 entre o minuto 40 e 50.
✅ 6/6 na Sangriña en 2022
🖤💛 Máis que nunca: #onosoInfernoéonosoceo
💪 Seguimos! pic.twitter.com/K75YN2F6j6— Mecalia Atlético Guardés (@Atlguardes_ofic) March 19, 2022
O BM Porriño segue marcando os postos vermellos
Logo dun par de xornadas sen competir, o Conservas Orbe Rubensa Bm Porriño volvía á carga este sábado. O Pavillón Municipal José Antonio Gasca acollía o regreso das galegas ante o líder, o Super Amara Bera Bera.
O encontro deu comezo co Conservas atacando, aínda que a primeira en abrir o marcador sería Laura Hernández trala parada de Alice Fernandes. Na parcela defensiva, as porriñesas presentaban un 5:1 con Thais Fermo impedindo que as locais atacasen con comodidade.
Deste xeito, fronte á intensidade, e o acerto local, Carolina Bono, cargouse ás costas a faceta goleadora con lanzamentos sorpresivos moi complexos de deter para a gardarredes local, aínda que a súa aportación non puido evitar a derrota por 17-8 ao tempo de descanso.
Na reanudación, o escenario non cambiou. Isma Martínez volvía situar ao seu equipo no 5-1 defensivo, mentres que o Bera Bera daba a dirección de xogo a Arrojeria. O Porriño con Bono, Casasola, Samartín, Santomé ou Tavares volvían bater contra defensa donostiarra e só un dous contra dous de Tavares con Haridian resultaba efectivo, malia que a renda local seguía aumentando ata o 32-17 definitivo.
Final do partido, as nosas chicas non puideron remontar o resultado ante o líder ‼️@BalonmaBeraBera 32🆚Conservas Orbe Rubensa Bm Porriño 17
📷Super Amara Bera Bera#LigaGuerrerasIberdrola pic.twitter.com/bWT6jPkalI
— Club Balonmano Porriño (@BmPorrino) March 19, 2022
