A fin da primeira volta da Primera División Femenina de voleibol está cada vez máis preto e os partidos son cada vez máis relevantes. A sorte das galegas na última xornada desta categoría foi moi dispar, cunha vitoria, un partido moi axustado que rematou en derrota e outro encontro perdido.
Os equipos do Calasancias Coruña e do CV Bruxas achéganse aos seus obxectivos de permanecer na categoría e seguir mellorando o seu xogo, mentres que o Aceites Abril CVO perdeu a oportunidade de colocarse como líderes e caeu do podio da táboa clasificatoria.
O Calasancias colle ritmo no seu debut na categoría
As xogadoras do Calasancias Coruña visitaban ao CD Voleibol Astillero, un rival directo ao que só sacaban un punto de vantaxe na clasificación. Coa vitoria desta décima xornada, as coruñesas afiánzanse nunha categoría na que están a debutar esta tempada e na que pasaron varias xornadas como colistas.
Agora, tras esta vitoria (a terceira deste curso), as galegas do Calasancias seguen sumando a falta dun partido para que peche a primeira volta. Para lograr sumar os tres puntos, as xogadoras tiveron que remontar o encontro, que comezou do lado do Astillero, que asinou o primeiro set ao seu favor, cun 28-26.
Para os tres seguintes, o cadro herculino tomou a iniciativa e apuntouse o segundo, o terceiro e o cuarto, cun 18-25, 20-25 e 24-26 respectivamente.
Na seguinte xornada, a undécima desta tempada, as coruñesas recibirán no Barrio das Flores ao Fertiberia Los Campos, un dos grandes da liga que ocupa a terceira posición.
As galegas do Bruxas rozaron a vitoria
Pola súa banda, o cadro das Bruxas estivo moi preto de sumar outra vitoria ao seu casilleiro. As xogadoras de Ames recibían a un dos equipos máis fortes da liga, o Curtidora Universidad de Oviedo.
Malia a diferenza de sete puntos coa que chegaron ao partido, con case o dobre de vitorias o Curtidora que o conxunto das galegas, o Bruxas deu unha moi boa imaxe. Foi necesario un tie break para decidir ao vencedor do duelo.
Cun encontro de altibaixos para ambos combinados, o vaivén de puntos era constante. Comezou atacando forte o cadro galego, levandose o primeiro set grazas aos erros das visitantes. Para os dous seguintes sets, o Curtidora apretou o acelerador e dominou na pista.
O equipo de Ames remontou ata o empate no cuarto set, polo que foi necesario un quinto para o desempate. Un 2-3 final, dun partido do que as galegas poden sentirse moi orgullosas.
O seguinte reto das amienses será ante o D’Elhuyar, o sábado, ás 16:30 horas. Xa en xaneiro, antes do inicio da segunda volta, recuperarán o partido ante o Universidad de Valladolid, o sábado, día 9.
O Aceites Abril perde a oportunidade de ser líder
O equipo ourensán enfrontábase tamén a outro asturiano, o CV Oviedo, líder na categoría. O Aceites Abril chegaba na segunda posición, con gañas de aproveitar a oportunidade para adiantarse ás ovetenses.
O primeiro tempo mostrou a igualdade entre ambos conxuntos que xa se podía ver na táboa clasificatoria.
Os intercambios de saques foron constantes e foi nos minutos finais cando o Oviedo adiantouse cun 30-28 no marcador.
Esta vantaxe mantívose no resto do encontro, que tamén estivo moi disputado.
O plantel que prepara o adestrador Pablo Pérez apretaba e loitaba polo empate, pero as asturianas foron superiores sendo máis contundentes e efectivas nos finais de set, o que lles permitiu levarse todos os sets cun 3-0.
Este foi o último partido para as ourensás deste ano 2020 e deberán agardar ata o 12 de xaneiro para unha segunda volta que se presenta moi dura e na que deberán loitar duramente por manterse no alto da clasificación.
