Histórica actuación da representación galega, encabezada polo triunfo na categoría absoluta do Club de Remo Chapela, no Campionato de España de bateis, que regresaba medio século despois á localidade guipuscoana de Pasaia.
A primeira alegría chegou nada máis comezar o campionato, na categoría infantil feminina, co triunfo da SD Tirán nun apertado final co CR Mecos. Tan só 82 centésimas foron as que separaron ás grovenses das remeiras moañesas, que recuperaron nun último longo espectacular 5 segundos que non foron suficientes para levarse vitoria. Pecharon o podio 100% galego as remeiras de Cabo da Cruz.
A segunda alegría da xornada chegou a continuación, na categoría cadete feminina. De novo pleno galego, con dominio claro do Club de Remo Robaleira, que avantaxou en 8 segundos ás rapazas da SD Samertolameu e completou o podio a SD Tirán, que lograba así o segundo metal da xornada.
O desencanto do día chegou na categoría xuvenil feminina, unha categoría que sempre aportou moitas ledicias para o remo galego. Nesta edición só o CR Náutico de Riveira logrou meterse na final, rematando nunha meritoria cuarta praza a tan so 6 segundos do terceiro lugar e fóra do podio.
Completaron a xornada histórica, que sen dúbida foi histórica polos resultados acadados polo remo feminino galego, os clubs de Club de Remo Chapela, CR Cabo da Cruz e CR Ares, que lograron o último pleno da xornada na categoría absoluta nun axustado e espectacular final de regata. Estas tres embarcacións, xunto coa cántabra de La Planchada, chegaron cunha diferencia de tan só 4 segundos e so 50 centésimas separaron a segunda praza da cuarta.
Ao igual que sucedeu na tempada 2019, co CR Cabo da Cruz, o CR Mecos, a SD Samertolameu e o CR Náutico de Riveira a totalidade da representación galega da categoría absoluta feminina clasificouse para a xornada final.
Cadro de resultados do Campionato de España de Bateis
INFANTIL FEMININO
- SD Tirán
- CR Mecos
- CR Cabo de Cruz
CADETE FEMININO
- CR Robaleira
- SD Samertolameu
- SD Tirán
XUVENIL FEMININO
- Pasai Donibane Koxtape AE
- SD de Remo Kaiku
- Isuntza Arraun Elkartea
ABSOLUTO FEMININO
- CR Chapela
- CR Cabo da Cruz
- CR Ares
- CR Puebla
- CR La Planchada
- Arkote Club de Remo – Arkote Arraun Taldea
CADETE MASCULINO
- Deustuko Arraun Taldea
- Club de Remo Actividades Náuticas
- Club de Remo Chapela
XUVENIL MASCULINO
- Pasai Donibane Koxtape A.E.
- Itsasoko Ama
- SD Samertolameu
- Zierbena Arraun Elkartea
- SD Samertolameu
- Club de Remo Kaiarriba
Outro dato a destacar, que fai que este campionato de bateis sexa histórico, é o número de metais acadados polas representantes galegas.
Dende a creación das catro categorías femininas no ano 2019, anteriormente eran so tres (promesa, xuvenil e absoluta), lográronse por primeira vez 9 metais. No 2021 foron 7 os metais, no 2020 foron 8 e no primeiro ano con catro categorías en liza foi de 7 metais.
Sen dúbida estes resultados demostran a boa saúde coa que conta actualmente o remo feminino, tanto en bateis como na embarcación raíña, as traiñeiras.
Recordo para a tripulación do Vila de Pitanxo
O xesto destacado da xornada, sen dúbida algunha, protagonizárono as campionas de España da categoría infantil, as rapazas da SD Tirán.
No acto de entrega de premios, as remeiras moañesas subiron ao podio cunha pancarta que portaron as familias dos 21 falecidos do buque Vila de Pitanxo, o pasado mes de febreiro, na que pedían á búsqueda de “verdade e xustiza”.
Esta vitoria contaba cunha dedicatoria especial. O adestrador destas deportistas galegas é Kevin González, remeiro da SD Tirán, e fillo dun dos mariñeiros desaparecidos no naufraxio co Vila de Pitanxo.
