A situación sanitaria derivada da COVID-19 levou á Xunta de Galicia a activar restricións na cidade da Coruña. Esta circunstancia motiva que o RC Deportivo recuara na súa intención de contar un cento de seareiras nas bancadas no partido do Dépor ABANCA contra o Santa Teresa en Abegondo. O encontro terá lugar mañá sábado ás 13:00 h pero a porta pechada.
A volatilidade da situación sanitaria fai que as novas sobre a disputa de partidos ou o xeito en que se levan a cabo (con público, a porta pechada, ou con limitacións de aforo), se vexan modificados constantemente. É a nova normalidade coa que nos toca vivir, unha realidade na que a premisa de preservar a saúde da comunidade e evitar a expansión de contaxios da COVID-19 é o fundamental.
Neste sentido o RCD anunciaba que “en atención ás novas medidas das autoridades que limitan a mobilidade nas cidades galegas e outros municipios da área metropolitana coruñesa, o Real Club Deportivo tomou a determinación de que o partido Deportivo ABANCA – Santa Teresa se dispute a porta pechada na Cidade Deportiva de Abegondo”.
Tal e como explican desde o club herculino o RC Deportivo “contactará persoalmente por correo electrónico co centenar de socios que dispuñan de invitación para o partido para comunicarlles que non poderán acudir ao partido nas instalacións do Dépor“.