Aínda lembro, anos atrás, cando xogaba ao FIFA 17 un partido feminino de seleccións. Ao rematalo acadei un logro de bronce “ultrarraro” por marcar 5 goles. Unha cousa incríbel. Marcar 5 goles nun partido feminino, algo que só foi capaz de facer o 4.5% dos xogadores e xogadoras. Isto representa a situación da inclusión das mulleres no mundo dos videoxogos deportivos: non interesa.
Aínda que eu vos falo de algo que pasou hai 5 anos, a postura da industria non avanzou o que debería.
No 2015 levouse a cabo unha campaña que demandaba a inclusión de equipos femininos neste videoxogo. Vero Boquete, futbolista galega coñecida pola súa implicación co deporte feminino, foi a encargada de darlle voz no noso país. Un ano despois, FIFA 16 incluíunos por primeira vez, o que foi un gran paso para a normalización do fútbol feminino. Pero desde aquela xa choveu.
Aínda con todo isto, na última versión do título, o FIFA 22, só se poden xogar fútbol feminino no modo de seleccións. E este unicamente conta con 15 equipos. O único que se engadiu nesta nova edición do popular videoxogo foi a posibilidade de incluír xogadoras e crear personaxes femininos no modo “Clubes Pro”, que permite gozar dunha experiencia máis realista do fútbol en liña.
Máis de 17.000 xogadores, máis de 700 equipos representados, e só 15 equipos femininos. Non é un número do que estar orgulloso.
Non é dabondo. E estes só son datos do videoxogo de deportes máis xogado do mundo.
