O CBS Cambre volveu a competir en casa, no Campo Acea de Ama, desta vez co Projecte Gavá como rival. Na dobre xornada, a novena da Spanish Softball League, as galegas sumaron unha vitoria pero cederon unha derrota.
Na vindeira semana, as de CBS Cambre enfrontaranse na derradeira xornada da primeira fase ao equipo de Viladecans en terras catalás. As galegas aínda teñen posibilidades de alcanzar o grupo intermedio da clasificación, o que lles permitiría loitar por unha praza no torneo da Copa da Raíña se consiguen un bo resultado.
Vitoria local no primeiro partido
O primeiro encontro da xornada caeu do lado cambrés cun emocionante final de partido. O duelo chegaba á final da sétima entrada con cinco carreiras a dous a favor das catalás.
A pitcher visitante complicou o partido para o seu equipo, ao conceder dous bases por bola e darlle a oportunidade á unha terceira bateadora cun lanzamento incontrolado que golpeou nunha bateadora local.
A partir de entón o turno ao bate na parte alta por parte das locais foi demoledor. Bastaron dous hits sinxelos de Marta Rey e Laura Paz e un poderoso dobre de Fátima Núñez para anotar as carreiras da vitoria.
O explosivo final acadouse cunha sólida defensa do equipo do Cambre, tal e como demostraron ao longo do encontro. O resultado final foi un 6-5.
O CBS Cambre caeu no segundo
O segundo partido seguiu o guion establecido no primeiro, con ataques contundentes freados por serias defensas. A cuarta entrada chegou con táboas no marcador cun empate 2-2.
Entón, as bateadoras visitantes reaccionaron con poder anotador para sumar tres carreiras máis, que non puideron ser contestadas pola ofensiva local. Na quinta entrada seguiu a sangría visitante, desta vez apoiada polos erros en defensa galega.
O resultado non puido ser remontado polas locais, malia anotar tres carreiras na última entrada. O partido rematou no 5-12.
