O Dépor ABANCA vén de anunciar a renovación da centrocampista Henar Muiña Asla (Gijón, Asturias, 20 de outubro de 1999). A futbolista amplía o seu contrato co RC Deportivo ABANCA por unha temporada máis quedando vencellada así á entidade branquiazul até o 30 de xuño de 2024.
A centrocampista asturiana chegou o pasado verán procedente do CDE Racing Féminas, club no que militou unicamente na campaña 2021-22 despois dun curso no CD Parquesol. Con anterioridade, xogou desde idade infantil no Real Oviedo Femenino (anteriormente Oviedo Moderno CF), conxunto co debutou na máxima categoría nacional con só 15 anos compartindo mediocampo coa ex xogadora deportivista Iris Arnáiz. Aquela temporada disputou 23 encontros (12 como titular) e marcou 1 gol na división de honra.
#ASNOSAS | Henar amplía o seu compromiso co Dépor ABANCA até xuño de 2024 https://t.co/XdoNzr97FE Grazas polo teu compromiso co #Dépor, @heenaar4! 💙 #ONosoCompromiso pic.twitter.com/DrdCaIcFGk
— RC Deportivo (@RCDeportivo) February 2, 2023
Henar, unha peza fixa no esquema de Ferreras
Na presente campaña, Henar Muiña Asla converteuse nun alicerce do Dépor ABANCA. Poderíamos dicir que o seu concurso é indiscutible no esquema da adestradora Irene Ferreras xa que a futbolista disputou 17 dos 18 encontros ligueiros do conxunto branquiazul. Ademais, en todos eles estivo no once inicial xogando así coma titular deportivista, e sendo substituída só en dúas ocasións.
O único encontro no que Henar non saltou ao terreo de xogo foi por sanción, ao cumprir ciclo de cartóns amarelos.
