O Concello da Coruña da un paso máis á hora de atender unha vella demana do rugby coruñés: poder empregar os campos da Torre na cidade herculina. A Xunta de Goberno Local do Concello da Coruña aprobou esta mañá (mércores 16 de decembro) o proxecto de rehabilitación desasinstalacións deportivas.
O proxecto de rehabilitación dos Campos da Torre conta cun presuposto de 988.980,36 euros, inclúe a instalación dun sistema de rega automática e o cambio do céspede artificial dos campos de fútbol 2, 3, 4 e 5.
No campo 2, instalarase un céspede homologado que permitirá practicar fútbol e rugby. Deste xeito, daráselles resposta ás demandas dos clubs de rugby da cidade, que demandan unhas instalacións adecuadas para a práctica deste deporte. Unhas das beneficiadas desta mellor serán as xogadoras do CRAT Residencia Rialta.
As obras licitaranse no vindeiro ano coa idea de que, unha vez que finalicen as actividades deportivas en maio, se poidan acometer os traballos. O prazo de execución é de 4 meses.
A alcaldesa, Inés Rey, mostrou a súa satisfacción pola posta en marcha dunha actuación que responde a un dos primeiros compromisos do Goberno local ao chegar a María Pita e que supón “a mellora dunhas instalacións que simbolizan o deporte da nosa cidade”.
As melloras nos campos da Torre súmanse ás do de Eirís
Rey lembra que esta actuación súmase á construción en Eirís do novo campo de fútbol de herba artificial, vestiarios e peche perimetral. Asumirá os traballos a empresa Arias Hermanos por un importe de 1.077.062 euros.
O prazo de execución das obras é de oito meses, polo que o novo terreo de xogo estará rematado no verán do 2021.
Neste senso, a concelleira de Deportes, Mónica Martínez, apuntou que tamén se está a traballar no proxecto da cuberta do campo de fútbol de San Pedro de Visma, tal e como anunciou hai poucas semanas ante os clubs da cidade.
