O Mecalia Atlético Guardés conseguiu reter un ano máis ás pivotes Carla Gómez e Sarah Valero. Ambas conformarán xunto a África Sempere o trío de xogadoras que pelexará na liña de seis metros por terceiro ano consecutivo. Con estas renovacións o equipo do Baixo Miño apontoa unha posición básica no esquema de xogo de José I. Prades con xogadoras que ademais ofrecen un rendemento sobresaliente en defensa.
Carla Gómez: “Foi unha pena non poder terminar a tempada como se merecía”
A pivote catalá Carla Gómez vivirá a súa cuarta tempada no equipo da Guarda. Gómez chegou ao Mecalia fai xa tres anos procedente do Mavi A Calzada e converteuse nunha peza crave do sistema defensivo de José I. Prades. “Estou moi contenta de poder formar parte outro ano máis deste gran equipo, pobo e afección” conta Carla Gómez tras confirmar que a próxima tempada seguirá defendendo a elástica guardesa. Para a súa continuidade apunta como clave o feito de que “che fan sentir como na casa en cada momento”, agradece.
Carla Gómez, xogadora do Atlético Guardés: “Estou moi contenta de poder formar parte outro ano máis deste gran equipo, pobo e afección”.
Gómez chegou ao Guardés para formar dupla con África Sempere en 2017 e xusto un ano despois incorporouse ao persoal a moza Sarah Valero. As lesións, de maneira aguilloada no caso da pivote francesa, fixeron que as tres teñan que dobrar esforzos polo grupo.
Aínda así, Gómez apunta que a tempada 2019-2020 foi “marabillosa” aínda que lamenta non poder despedila como se merecía: “todos xuntos”. E xa avisa: “volveremos, ‘O Inferno’ volverá”. A pivote queda ademais co bo sabor de boca que deixa un ano en que o equipo chegou aos cuartos da Challenge Cup, marchaba terceiro na Liga Guerreiras Iberdrola e clasificado para a fase final da Copa da Raíña: “gozamos moito dentro e fóra da pista”, celebra Gómez.
Sarah Valero: “Ilusióname pelexar un ano máis por todas as competicións”
Coa mesma ilusión que Carla Gómez pronunciouse tamén Sarah Valero tras selar a súa continuidade no equipo: “Estou moi contenta de poder defender un ano máis as cores do Mecalia Atlético Guardés”, afirmou. A pivote franco-española cambiou a liga francesa pola Liga Guerreiras Iberdrola hai dous anos co obxectivo de “progresar”.
Así o fixo a pesar de que xusto no seu primeiro ano (novembro, 2018) sufriu unha rotura de ligamento cruzado anterior e menisco no seu xeonllo esquerdo que lle obrigou a deixar a campaña en branco. No seu segundo ano na Guarda, tampouco puido xogar a tempada completa ao estar lesionada máis ou menos de novembro a marzo.
Sarah Valero, xogadora do Atlético Guardés: “Estou moi contenta de poder defender un ano máis as cores do Mecalia Atlético Guardés”.
Desde a súa casa en Pau confesa que “me ilusiona pelexar un ano máis por todas as competicións” e máis “á beira de toda a nosa xente e obvio nosa Pena O Inferno, que sempre nos fixeron sentir oito na pista tanto nos bos como nos malos”, agradece.
A moza xogadora, que chegou a participar nalgunha actividade do ‘Obxectivo 2021’, adianta que ten “moitas ganas de poder gozar de novo na pista, de seguir pelexando e de deixarme a pel no campo”.
