- O Mecalia Atlético Guardés debuta no ‘exilio’ de Tui cunha vitoria chea de fe ante o BM Granollers.
- A pesar de ir a remolque durante gran parte do encontro, o equipo que adestra Abel González nunca se rendeu e levantou os dous puntos nun final de infarto.
- Unha demoledora Sandra Santiago, con nove goles, e as paradas de Míriam Sempere foron as claves do triunfo do conxunto miñoto.
O conxunto galego do Mecalia Atlético Guardés iniciou a competición ligueira cunha vitoria das que supoñen moito máis que dous puntos. Este triunfo constitúe unha inxección de moral e unha subida de adrenalina importante grazas a unha remontada fronte ao KH7 Granollers fraguada nun último minuto frenético, no que saíu a relucir de novo o xene competitivo deste equipo, que entrou dous abaixo ao últimos dez minutos de encontro. As paradas de Míriam Sempere e os goles (9) de Sandra Santiago cristalizaron o vitoria o gran traballo colectivo do equipo de Abel González.
Todo nun último minuto de infarto. Santiago igualou a 23 e a partir de aí viñeron unha perda visitante, unha falta en ataque da propia primeira liña portuguesa e unha parada de Míriam Sempere. Polo medio, dous tempos mortos. Tras o último, solicitado por Abel González, faltaban 13 segundos. Ao conxunto do Mecalia Atlético Guardés sobráronlle cinco.
O gol que deu o triunfo ao Guardés
A conexión lusa entre Patrícia Lima e Sandra Santiago acabou nun lanzamento á escuadra da lateral de Águeda. O seu noveno tanto do encontro e o da vitoria guardesa.
Foi o colofón a un exercicio de fe. Porque durante case todo o choque foron por detrás as xogadoras de Abel González, que puido contar con Celia López grazas a unha recuperación de última hora. A alacantina non tivo moitos minutos para previr o seu maltreito maimiño, pero achegou en defensa e en ataque -un gol-.
Durante o primeiro tempo, Ester Somaza e Martina Capdevila danaron a defensa local. Pero calquera simulacro de escapada do conxunto vallesano era cortado rapidamente polo miñoto. Con todo, un acelerón final das catalás permitiulles irse dúas arriba ao descanso (12-14).
Tras el, as visitantes do KH7 Granollers mantiveron as vantaxes ao redor do dous goles e avanzaron polo segundo acto cos picotazos do Guardés ao marcador para evitar males maiores. Santiago lideraba a ofensiva, ben acompañada por Patrícia Lima, María Sancha, Júlia Nuez e o xogo con Carla Gómez na liña. Así, ata que o choque entrou no momento candente. E xa se sabe que ninguén se move mellor no lume que o equipo da Guarda, impulsado polos seus afeccionados coma se Tui fóra A Sangriña (enchéronse os dous buses ata o Municipal tudense). Aí, onde outras se queiman, as xogadoras que adestra o técnico Abel González crécense. E así sumaron a primeira vitoria do curso 2022-23 no seu ‘exilio’ tudense.
FICHA TÉCNICA
24) MECALIA ATLÉTICO GUARDÉS (12+12): África Sempere (1), Sandra Santiago (9), Giselle Menéndez, Ángela Nieto (1), Míriam Sempere (p.), Cristina Cifuentes (2), Patrícia Lima (1), Celia López (1), Elena Amores (3), Carla Gómez (2), María Sancha (3), Marisol Carratú (p.), Júlia Nuez (1) e Daniela Moreno.
23) KH7 GRANOLLERS (14+9): Nicole Wiggins (p.), Ben Chayab (1), Alarcón, Ona Vila, Lea Kofler (2), Ona Vegué (2), Marta Mera (p.), Ester Somaza (4), Paula Herce (2), Ana González (3), Santos, Jana Castañera, Martina Capdevila (9) e Anna Zarzuela.
EQUIPO ARBITRAL: Adrián Valdés e Francisco Fernández. Excluíron durante dou minutos ás xogadoras do conxunto local: Elena Amores e Júlia Nuez , así como á deportista do equipo visitante Ester Somaza.
MARCADOR CADA CINCO MINUTOS: 1-3, 3-4, 6-6, 8-9, 11-11, 12-14 –descanso- 14-15, 16-17, 17-17, 19-20, 22-23, 24-23.
INCIDENCIAS: Partido correspondente á primeira xornada de competición na Liga Guerreras Iberdrola 2022-23 disputado no Pavillón do Concello de Tui onde o Mecalia Atlético Guardés actuará como local debido ás obras que se están a realizar no Pavillón da Sangriña, habitual escenario dos partidos na casa das do Concello da Guarda.
