A loita ata o último suspiro que caracteriza o xogo do HC Deportivo Liceo viviu un novo capítulo en Les Comes, onde o conxunto que prepara Stanis García venceu ó Igualada cando o partido parecía condenado ó empate. Cun 1-1 no electrónico, no último minuto do partido as verdibrancas anotaron dous goles e puxeron o partido 1-3. Son xa 44 puntos os sumados polas xogadoras liceístas nunha gran segunda volta.
A galega María Sanjurjo foi a encargada de inaugurar o marcador en Les Comes ós tres minutos. As sextas clasificadas da OK Liga Iberdrola golpeaban primeiro e a domicilio. Foi un gol que doeu nas costas das sétimas. O Igualada viuse posteriormente anulado por un gran traballo defensivo das galegas. Pouco ocorreu no resto do primeiro acto deste cruce, cun Liceo que xestionou cómodamente a súa vantaxe.
Outra cousa sería a segunda metade. Ese periodo final do partido entre catalás e coruñesas ofreceu moita máis emoción sobre a cancha. Máis aínda se nos centramos nos compases finais. O Igualada avanzou liñas, xerou máis perigo e foi capaz de empatar o encontro a falta de catro minutos para a conclusión. Fíxoo Rocío Ramón ó rematar unha bóla a escasos centímetros de Viki Caretta.
Lonxe de baixar os brazos e a pesar de non ter obxectivo, as xogadoras que prepara Stanis García reaccionaron e atoparon un penalti. Alba Garrote errou e o medo chegou cando Pati Miret, a local máis perigosa, lanzou unha directa. Viki Ceretta, en honor ó seu gran curso, detívoa sen nervios. Colosal.
No último minuto, a internacional Bea Gaete atopou o ansiado tanto da vitoria para celebrar o seu recente regreso ás pistas. María Sanjurjo protagonizou o 1-3 co Igualada atacando con cinco mulleres de pista.
Ver esta publicación en Instagram
Último partido da tempada para o Liceo, en casa co Vila-Sana
A OK Liga Iberdrola rematará para o HC Deportivo Liceo coa visita a Riazor do Vila-Sana o vindeiro sábado 28 ás 20:00 horas.
FICHA TÉCNICA
1) IGUALADA: Cristina Riba; Pati Miret, Aida Mas, Carolina Herrera e Helena de Sivatte- quinteto inicial -. Tamén xogaron:Arian Martín, Rocío Ramón, Laura Crespo, Gina Balcells e Mónica Ferrer (p.s.)
3) HC DEPORTIVO LICEO: Viki Caretta; María Sanjurjo, Alba Garrote, Bea Gaete e Adriana Soto – quinteto inicial -. Tamén xogaron: Lucía Yáñez, Cris Diz e Mencía Mosquera (p.s.)
EQUIPO ARBITRAL: Cristian García Peris. Sen cartóns.
GOLES: 0-1 (María Sanjurjo, min. 3). 1-1 (Rocío Ramón, min. 46). 1-2 (Bea Gaete, min. 50). 1-3 (María Sanjurjo, min. 50).
INCIDENCIAS: Xornada 25 da OK Liga Iberdrola 2021-22 disputada na cancha de Les Comes.
