O BAXI Ferrol tívose que pór o mono de traballo para remontar na cancha do ADBA Avilés, sumar a súa vitoria número 21 de xeito consecutivo e así igualar o récord de trunfos na LF2.
Dúas partes completamente diferenciadas tivo o encontro do BAXI Ferrol na cancha do ADBA Avilés, cunha primeira metade do conxunto departamental para esquecer, mentres que, despois do descanso, cambiou radicalmente para sumar o seu vixésimo primeira vitoria, co que iguala a súa propia marca de triunfos na categoría.
Ver como un rival duplica en puntos ao BAXI Ferrol non é o habitual esta tempada na que as da cidade departamental están intratables. Pero ao final da primeira metade no partido desta fin de semana en Avilés iso era exactamente o que pasaba. As galegas perdían por un duro marcador de 31-16. O xogo do equipo ferrolá non se parecía en nada ao habitual.
O toque de atención e as instrucións que o adestrador das ferrolás, Lino López, debeu trasladar ás súas xogadoras no vestiario foi efectivo. O parcial do terceiro cuarto, a favor das galegas, o deixa claro 13-27.
Unha primeira parte para borrar da memoria
Neste cruce en terras asturianas, o equipo ferrolán colocouse moi rápido cun 3-9 ao seu favor, o que presaxiaba que ía ter un partido cómodo ante un rival da zona baixa da táboa. Pero nada máis lonxe da realidade, porque o equipo ferrolán non foi capaz de anotar nos últimos minutos do primeiro cuarto, mentres que tres triplos consecutivos do seu adversario deixaron o marcador nun 12-9.
Parecía que no segundo parcial ía chegar a reacción visitante, pero foi todo o contrario. As xogadoras do conxunto galego amosáronse moi brandas en defensa e con poucas ideas en ataque, polo que lles custaba anotar. Mentres, a escuadra asturiana, con moita confianza, ía ampliando a súa vantaxe, até unha máxima de quince puntos, 31-16, coa que as xogadoras se retiraron a descansar aos vestiarios.
Reacción do BAXI Ferrol logo do descanso
A reprimenda de Lino López ás súas pupilas deu os seus froitos, porque o equipo saíu á cancha cunha actitude completamente distinta, con gran intensidade defensiva, que lle permitiu roubar varios balóns e ir recortando a desvantaxe até terminar o terceiro parcial cun marcador apertado de 44-43.
A sentenza chegou nos primeiros minutos do último cuarto, no que o conxunto ferrolán logrou un parcial de 0-11, para situarse cun 44-54. A partir de aí o equipo avilesino acusou o esforzo realizado e o BAXI Ferrol controlou a situación para terminar impóndose por un resultado de 54-69.
A xogadora con maior valoración do choque (24) foi Marcy Ariana de Sousa Gonçalves que con 18 puntos asinados foi tamén a maior anotadora do partido.
As ferrolás seguen a liderar a clasificación logo desta nova vitoria na Liga Feminina 2 que suma a súa 21ª consecutiva na competición ligueira neste curso 2020-21.
O vindeiro domingo 28 de febreiro, ás 12:00 horas, o BAXI Ferrol terá que empregarse de novo a fondo. Esta vez para manter a súa condición de invicto no cruce que disputara na Malata ante o Osés Construcción Ardoi. Trátase do segundo clasificado.
💥 Final del Partido
🏆 #LF2/ Jornada 21
🏀 @ADBA87 54
@UniFerrol. 69
📶 Estadísticas.https://t.co/pu7idZBxZT
🎥 En directo:
📺 https://t.co/uLFF5iwBve📺 Vinx
🎙️Al micro el gran @alfonsolaluz (@CanastAsturiana)#VamosAdba#QGT#FundaviTeams pic.twitter.com/40Omq8b1X0— ADBA (@ADBA87) February 20, 2021
FICHA TÉCNICA
54) AGRUPACIÓN DEPORTIVA BALONCESTO AVILÉS: Artemis Leonor Barbosa (16), Marcy Ariana de Sousa Gonçalves (18), Sara Fraile (11), Laura Martínez (3) e Elisabet López (4) – quinteto inicial -. Tamén xogaron: Marcia Rossana Guimaraes (-), Guadalupe López (-), Hailey Danielle Dias Allen (-) e Carlota Velasco Yepes (2).
69) BAXI FERROL: Brooke Salas (10), Laura Mª Fernández (3), Irene Gari Gilaber (9), Geraldynn Leaupepe (10) e María Anniina Iajanen (4) – quinteto inicial -. Tamén xogaron: Patricia Cabrera (3), Julieta Mungo (6), Patricia Benet (8), Andrea Boquete (8) e Sune Swart (8).
PARCIAIS: 12-9, 19-7, 13-27 e 10-26.
ÁRBITROS: Adrián Pérez Martínez e Álvaro Cubero Rodríguez dirixiron o choque.
INCIDENCIAS: Encontro correspondente á 21º xornada da Liga Feminina 2 disputado no Complexo Deportivo Avilés na localidade asturiana do mesmo nome.
