O Concello da Coruña, a través da súa Concellaría de Medio Ambiente, rematou os traballos de restauración e mantemento das instalacións do skatepark do barrio dos Rosales. O Concello da Coruña explica que levou a cabo estes traballos “tras escoitar as demandas e necesidades das persoas usuarias deste espazo, dunha moi alta afluencia”.
Para levar a cabo esta actuación “contouse coa participación de persoas usuarias habituais da pista, que propuxeron diferentes melloras técnicas e estéticas. Durante os traballos, substituíronse e reparáronse as diferentes estruturas que estaban danadas”, explican desde o Concello coruñés.
Por outra banda, co obxectivo de dar solución á aparición de pintadas, representantes da arte urbana coruñesa encargaranse de executar diferentes creacións artísticas neste espazo. Dirixirá esta proposta a Oficina Virtual do Graffiti, que coordinará o desenvolvemento do proxecto. “Estamos moi satisfeitos de poder contar co compromiso e a axuda da mocidade nestes labores de mantemento dunha pista tan demandada”, sinalou Esther Fontán, concelleira de Medio Ambiente.
Actuacións nas pistas de skate da Coruña
O Concello da Coruña explica que “está realizando unha importante labor de renovación e creación de skateparks na cidade”.
Por unha banda, na vindeira semana comezarán os traballos para crear unha pista de skate e multideporte na praza de José Toubes. Esta actuación inclúe a urbanización da contorna deste espazo con novas zonas verdes e espazos de lecer. As obras terán un orzamento e 450.000 euros e un prazo de execución de 4 meses”.
Por outra banda, xa está aprobada a contratación das obras de renovación integral da pista de skate do parque de Eirís, que contará cun orzamento de 525.000 euros. Esta infraestrutura contará con dous espazos principais tal e como demandaban os usuarios e usuarias (un bowl e unha skatepraza), adaptando a instalación a outros deportes urbanos como a patinaxe, o BMX e os patinetes. Crearase ademais un paseo peonil con bancos, fonte e aparcadoiros para bicicletas en paralelo ao bowl, e na parte central haberá un xardín que actuará como espazo separador entre ambas as zonas.
