Os números do BAXI Ferrol neste curso 2022-23 apuntaban ao que finalmente aconteceu. O Universitario regresa á élite do baloncesto feminino estatal. O equipo que adestra Lino López venceu ao Real Canoe e asinou un ascenso matemático logo de 12 partidos seguidos gañando, 25 triunfos de 28 e con dous partidos pendentes antes de rematar a liga.
A tempada do BAXI Ferrol só se pode cualificar de espectacular. O apoio na bancada da afección foi enorme neste partido decisivo ante o Sernova Renovables Real Canoe que as ferrolás venceron por un marcador de 76-52. Máis de 2.700 persoas acudiron á Malata para alentar ás galegas nun partido decisivo que tivo final feliz e celebración.
O BAXI Ferrol anotábase o primeiro cuarto marcando territorio ante o Sernova Real Canoe cun tanteo de 19-13. Foi no segundo cuarto cando puxo aínda máis distancia coas visitantes anotando dez puntos máis cas súas rivais (28-18) e poñendo o partido ao descanso en 47-31.
Dezaseis puntos arriba e dominando o xogo nos dous períodos previos, así empezaron as xogadoras que adestra Lino López o segundo acto dun partido que as podía levar de volta á elite. Cheiraba a épica. Acariñábase o ansiado ascenso.
Aínda que o terceiro cuarto non contou con moitos puntos anotados o 16-7 ampliaba a renda do Universitario Ferrol ata o 63-38 e facía soñar ao BAXI en voz alta co ascenso.
Ese marxe permitiu ás galegas controlar con clama o partido e incluso ceder o triunfo parcial no último cuarto ao Sernova Real Canoe por un punto (13-14)
O partido remataba cun tanteo de 76-52 e o BAXI Ferrol co título da LF Challenge nun peto e no outro co billete pagado para poñer rumbo ao ascenso á Liga Endesa so un ano despois de deixar a elite.
⛹️♀️ #LFChallenge: El @UniFerrol no falló en un abarrotado Pabellón de A Malata para certificar el título y el ascenso a #LFEndesa
▶ Disfruta de las mejores imágenes de la celebración ferrolana desde la Galería de @BaloncestoESP
📸 Galería fotos Flickr ⬇https://t.co/IQ4JpABcOe pic.twitter.com/Ck1Pu39XqP
— CompeticionesFEB (@CompeticionFEB) March 25, 2023
Lino López: “O traballo do día a día do BAXI Ferrol foi incrible”
Ao final do partido, o técnico do BAXI Ferrol, Lino López admitía estar “moi emocionado como ferrolá”. Apuntaba o adestrador que “desde os tempos do OAR na ACB non se vivía un ambiente na Malata como o vivido neste partido”. Advertía que conseguir “isto cun equipo feminino éncheche de orgullo. Estamos a enganchar a moita xente, creo que quen veu a ver o partido gozou. Sabemos o traballo que hai detrás”.
Sobre a tempada, Lino López apuntaba que se tiña afrontado “cada partido como unha final e cada adestramento ao cento por cento”. Consultado sobre a chave do éxito o técnico do BAXI Ferrol sinalaba ao “bo ambiente de traballo que había, e ao traballo do día a día que foi incrible, en humanidade, en axudar á compañeira, nunca con egoísmo, sempre en ben do equipo”.
Para o adestrador galego, Lino López, “ver o pavillón como está hoxe, encadear 12 vitorias seguidas… é unha data para gozar e non pensar en nada máis”. De feito, admitiu o adestrador que non estaba a pensar “na máxima categoría. Agora mesmo so penso en gozar. Só quero festa”, manifestaba sorrinte ao final do partido co obxectivo do ascenso á elite acadado.
FICHA TÉCNICA
76) BAXI FERROL (19+28+16+13): Claudia Soriano (16), Julieta Mungo (2), Marta Gómez (13), Jessica Fequiere (16) e Jenna Allen (14) – quinteto inicial -. Tamén xogaron: Nevena Dimitrijevic (-), Irene Gari (3), Angela Mataix (6), Fanny Kalin (2) e Andrea Boquete (4).
52) SERNOVA REAL CANOE (13+18+7+14): Lucía Rodríguez (4), Claudia Gómez (4), Marta Moix (2), Irene Baeza (6) e Macarena Roldan (9) – quinteto inicial -. Tamén xogaron: María Malpartida (2), Cristina Mato de Prada (3), Carmen Sol Molina Conesa (11) e Mariana Barata (11).
PARCIAIS: 19-13, 47-31, 63-38 e 76-52.
EQUIPO ARBITRAL: Alexis Fuentes Magarzo e Iván Escariz Torres.
INCIDENCIAS: Partido correspondente á 28ª xornada da LF Challenge da FEB disputado no pavillón da Malata (Ferrol) ante máis de 2.700 espectadores. O encontro supuxo a consecución do título de liga na categoría para as ferrolás ademais do ascenso á máxima categoría do baloncesto feminino estatal, a Liga Endesa.
