- Co regreso de Coruña42 ao calendario atlético despois da pandemia, volve tamén a Exporunning, a feira ao servizo das persoas corredoras, que abrirá ao público os días inmediatamente anteriores á proba, o 30 de setembro e 1 de outubro.
Palexco, nun enclave privilexiado, fronte ao peirao de transatlánticos da Coruña, será a sede desta nova edición de Exporunning, que conta coa organización do Concello da Coruña. Alí, as persoas participantes, ademais de recoller os seus dorsais e a bolsa do/a corredor/a, poderán descubrir as últimas novidades sobre a práctica do atletismo e todo o que se move ao seu arredor.
Nese punto de encontro para deportistas haberá espazo para nutrición, materiais deportivos con tendas especializadas en calzado e téxtil, provedores de servizos de hostalería ou de transporte aéreo e terrestre, clubs de running, outros maratóns, así como federacións e entidades deportivas.
A proposta multidisciplinar de Exporunning
A oferta de Exporunning inclúe relatorios multidisciplinares relacionados co deporte, a psicoloxía, a fisioterapia e outras cuestións derivadas da práctica do running.
A madriña desta edición de Exporunning será a atleta Julia Vaquero. Nada en Francia, pero criada na Garda (Pontevedra), especializouse en probas de media e longa distancia. Foi olímpica en Atlanta 96 e conquistou os europeos de cros de 1994 e 1996 así como o bronce por equipos en 1997. A súa historia deportiva transcendeu a outra de superación persoal.
Julia Vaquero participará no Breakfast Run e, ademais, correrá a 10K paralela ao Maratón Atlántica Coruña42. Tamén en Palexco, os e as atletas poderán gozar, ademais, da Pasta Party, onde se ofrecerá un buffet de pasta.
Con respecto á Coruña42, o prazo de inscrición ordinario na web www.carreirasgalegas.com está aberto ata o domingo 18 de setembro ás 23.59 horas e o extraordinario, desde o luns 19 de setembro ao domingo 25 dese mes, unha semana antes da carreira C42, tamén ás 23.59 horas.
Coruña42 volve e faino cun novo circuíto e un atractivo final
