De sábado a luns, A Coruña acolle o Campionato Galego de Optimist. A competición reunirá aos 137 mellores deportistas de Galicia, entre os que destaca o actual campión e número un do ránking, o coruñés Fernando González del Castillo.
“Desde o Concello estamos a realizar unha importante labor para promoción da vela, democratizando este deporte e abrindo a súa práctica aos alumnos dos centros educativos da cidade”, sinalou na presentación da cita deportiva a alcaldesa da cidade Inés Rey.
Lembrou Inés Rey que o Real Club Náutico da Coruña forma parte das entidades que participan no programa O Atlántico parte de ti, promovido polo Concello da Coruña e no que participan 16 colexios da cidade, 15 deles centros educativos públicos e un concertado. “A través desta iniciativa buscamos achegar o mundo da vela aos máis pequenos para que adquiran as técnicas básicas e coñezan e respecten as normas de seguridade e protección para o desenvolvemento de deportes náuticos”, indicou a alcaldesa nesa presentación do Campionato Galego de Optimist.
A rexedora agradeceu o traballo formativo que están a levar a cabo en colaboración co Concello os clubes Marina Coruña, Club Marítimo de Oza e Playa de Oza, ademais do Náutico, co apoio tamén da Federación Galega de Vela.
Inés Rey destacou que este 2023 A Coruña volverá a acoller tras sete anos de ausencia a regata de grandes veleiros Tall Ship Races. “Trátase dun evento de gran relevancia muncial que volverá situar a nosa cidade no punto de mira internacional durante catro días”, indicou a alcaldesa.
Para esta proba, segundo informa a Federación Galega de Vela cinco regatistas do grupo azul ascenden ao grupo amarelo, trátase de:
- SOFÍA AREVALILLO LAMPON | C.N.D. Riveira
- MARTA HURTADO DE MENDOZA RODRÍGUEZ | C.N. Marina Coruña
- MARCO MÍNGUEZ ESTÉVEZ | M.R.C.Y.B.
- CALIXTO ESCARIZ LÓPEZ | C.M. Canido
- DAVID VILLAVERDE FERNÁNDEZ | C.V.F. As Pontes
