Concello de Vilagarcía de Arousa e Xunta de Galicia acordaron a reforma integral do Pavillón de Fontecarmoa no municipio pontevedrés, unha instalación deportiva con 40 anos de historia e na que, actualmente, disputa os seus partidos, por exemplo, a AD Cortegada que xoga na LF2.
As obras que se levarán a cabo no pavillón de Fontecarmoa constarán dunha reforma integral do edificio e a construción dun novo pavillón aproveitando a estrutura do xa existente.
Así, actuarase non só sobre os vestiarios e as instalacións eléctricas e de saneamento senón, e ante todo, sobre a cuberta e o illamento e tratamento de todo o peche perimetral e das instancias interiores.
Ao tempo se adoptarán todas as medidas necesarias para acadar a eficiencia enerxética esixible na actualidade nos edificios públicos.
O pavillón número 1 é o centro de todo o complexo polideportivo de Fontecarmoa, no que hai dous pavillóns de deporte, un estadio de atletismo, dous campos de fútbol, varias pistas de tenis e unha piscina.
O secretario xeral para o Deporte da Xunta de Galicia, José Ramón Lete Lasa, vén de anunciar esta actuación logo dunha xuntanza telemática mantida co alcalde de Vilagarcía de Arousa, Alberto Varela. A Xunta de Galicia achegará o 33% da reforma integral do pavillón número 1 de Fontecarmoa, mentres que o concello vilagarcián farase cargo dos 2/3 do presuposto. O orzamento total da actuación no Fontecarmoa roldará os 1,5 millóns de euros.
Segundo informa o Concello de Vilagarcía de Arousa, a falla de que a memoria inicial “se converta nun proxecto de obra en sentido estrito, estímase que o presuposto necesario roldaría os 1,5 millóns de euros. Cando o documento estea listo, Varela e Lete asinarán o correspondente convenio, pero, en calquera caso, a ansiada reforma do pavillón xa conta co compromiso de financiación”.
O concello pontevedrés ten previsto aprobar o seu orzamento para 2021, que inclúe, no capítulo de investimentos, unha partida de 800.000 euros. O resto da aportación municipal, “ata aproximadamente un millón, procederá dalgunha das intervencións previstas ás “Liñas de actuación” da Estratexia DUSI “Vilagarcía Avanza”, financiada con fondos FEDER“‘, explican desde o consistorio.
A intención é facer unha reforma integral do edificio, “que vaia moito máis alá de seguir facendo ‘parches’ en determinados aspectos para, ao final, case construír un novo pavillón aproveitando a estrutura do xa existente. Así, actuarase non só sobre os vestiarios e as instalacións eléctricas e de saneamento senón, e ante todo, sobre a cuberta e o illamento e tratamento de todo o peche perimetral e das instancias interiores. Ao tempo se adoptarán todas as medidas necesarias para acadar a eficiencia enerxética esixible na actualidade nos edificios públicos, e sobre o cal os plans europeos poñen tanto énfase (é o caso das EDUSIs como nas que participa Vilagarcía)”.
Fontecarmoa, 40 anos de testemuña do deporte de Vilagarcía
O pavillón número 1, sobre o que agora se pretende actuar, foi a orixe de todo o complexo polideportivo de Fontecarmoa, no que agora hai dous pavillóns de deporte, un estadio de atletismo, dous campos de fútbol, varias pistas de tenis e unha piscina que agora mesma está en proceso de ampliación. O pavillón número 1 supuxo, polo tanto, un fito na historia do deporte local.
Construído en 1981, cun investimento de 40 millóns de pesetas de entón, ao longo dos seus case 40 anos de uso, o edificio viu crecer o deporte vilagarcián, desde aqueles partidos que se celebraban no antigo pavillón do Movemento ou o do Liceo Marítimo por carecer dun verdadeiramente municipal, ata torneos internacionais nos que participaron seleccións nacionais absolutas e equipos sénior e júnior dos máis coñecidos clubs europeos de baloncesto (Real Madrid, Barcelona, Zalguiris, Cibona…).
Hoxe, o pavillón é sede do equipo feminino do AD Cortegada, que milita na Liga Feminina 2, e tamén de torneos de carácter internacional, o que esixe unha serie de características que non sempre son fáciles de cumprir, especialmente en canto se refire á climatización.
Dos 32.474.216 euros cos que conta a Secretaría Xeral para o Deporte en 2021 (un 28,5% máis que en 2020), 9,15 millóns serán destinados a obras de creación e reforma de infraestrutura deportiva, un 118% máis que en 2020 cando se destinou ao mesmo obxecto 4,2 millóns de euros.
