A Federación Galega de Piragüismo (FEGAPI) vai crear a primeira Rede galega de voluntariado náutico seguro, unha estrutura pioneira en Europa que publicitan baixo o lema “Padexa con nós”. Para poñer en marcha esta iniciativa vén de facer un chamado a través das súas redes sociais para captar persoas que desexen sumarse.
Ver esta publicación en Instagram
Explican que “cada fin de semana Galicia acolle numerosas probas náuticas nas que temos que redobrar esforzos para cubrir as necesidades de contro le seguridade. Por iso, coa axuda da Xunta de Galicia, están a crear esta Rede galega de voluntariado náutico seguro que permitirá formar a 100 persoas en cuestións de gran valía como prevención de riscos, primeiros auxilios, salvamento e rescate.
Un curso de balde en cada provincia galega para o voluntariado
O curso no que se impartirá esa formación para integrarse en “Padexa con nós” será totalmente gratuíto e haberá catro formacións básicas en cada provincia galega. Estas son as datas e os lugares onde se levarán a cabo:
- Pontevedra: 21 e 22 de marzo en Verducido.
- A Coruña: 18 e 19 de abril en Rianxo.
- Ourense: 9 e 10 de maio en Allariz.
- Lugo: 13 e 14 de xuño en Lugo.
A Federación Galega de Piragüismo (FEGAPI) informa de que, ademais, van realizar “unha formación superior en Verducido para todos aqueles que queiran ampliar o seu coñecemento”.
Segundo comentan desde a A Federación Galega de Piragüismo (FEGAPI) o curso abriría ás persoas particpantes “moitas portas no deporte e en todos aqueles ámbitos que precisen experiencia de seguridade e control”.
Para obter máis información convidan ás persoas interesadas en anotarse escribindo un correo electrónico ao e-mail: voluntariado@fegapi.org. Logo dese envío a FEGAPI poríase en contacto con esa persoa interesada na iniciativa “Padexa con nós”.
