O 2022 foi un ano con récords e éxitos para o atletismo galego. O ano que vén de rematar supuxo practicamente a volta á plena normalidade de toda a actividade atlética o que traería consigo un excelente número de resultados e rexistros no balance global de récords e campionatos.
Para comezar, durante o ano 2022 lográronse batir un total de 250 novos récords de Galicia, segundo informa a Federación Galega de Atletismo, dos que a maior parte corresponderon ás categorías másters que confirman con estas cifras, o importante medre que están experimentando tanto no incremento de licenzas como no de resultados deportivos.
Foron precisamente os atletas masculinos Pablo Fervenza, Xosé Luis Otero, Nemesio Gutiárez e Domingo Álvarez quenes protagonizaban ao principio do ano o récord do mundo de pista cuberta 4×800 na categoría M65. O propio Pablo Fervenza e Ignacio Fernández na M40, lograban a mediados de ano establecer sendos récords de España nas probas de milla en ruta e martelo pesado respectivamente.
O 2022, un gran ano para o atletismo galego feminino máster
Con todo, foron sen dúbida as atletas femininas as que máis éxitos colleitaron grazas aos nada menos que catro récords de España de Esther Pedrosa na categoría W60 nas probas de 3.000 m. (AL e PC), 5.000 m. e 10K e de Lucía Ferreiro en pértega na W40.
Si esto acontecía cos veteranos, as categorías base tamén pecaharon o ano con bos rexistros e actuacións para o atletismo galego, xa que un total de 92 novas mellores marcas galegas subiron a táboa do ranking permanente entre as categorías Sub10 ata as Sub20
Non nos esquecemos dos récords galegos absolutos que tiveron nas figuras de Adrián Ben sobre os 800 m., Ainhoa Repáraz nos 100 m., Joselyn Brea nos 3.000 m. así como a dos irmáns Daniel e Antía Chamosa, que facían o propio na marcha atlética ca nova distancia olímpica dos 35 Km., os cabeza de lista dun grupo total de dazasete novos rexistros absolutos neste 2022
Máis de medio milleiro de medallas e finalistas nos campionatos de España
Outro dos indicadores do ano 2022 para falar de éxito do atletismo galego foron as medallas logradas nos distintos campionatos de España desenvoltos nas modalidades de aire libre, pista cuberta, campo a través, ruta e montaña na que se lograron un total de 216 medallas (83 ouros, 65 pratas e 68 bronces) así como un total de 288 postos de finalistas.
Entre os mesmos compre salientar as sete medallas do atletismo galego logradas nos Campionatos de España absolutos tanto de pista cuberta, desenvolto en Ourense, como no de aire libre disputado en Nerja.
A lanzadora olímpica Belén Toimil lograba proclamarse campioa de España en peso nos dous eventos, salientando tamén para o atletismo galego os ouros na cita ourensá tanto de Saleta Fernández en salto de altura como de Ana Peleteiro en triplo salto, sen esquecer as dúas medallas de prata e bronce sobre os 800 m. logradas por Adrian Ben e o bronce en xavelina de Lidia Parada.
Xela Martínez acumulou títulos e récords
Un dos nomes propios deste ano no atletismo galego foi sen dúbida o da corredora lucense Sub-18 Xela Martínez quen remataba o 2022 co sexto posto no seu debut internacional no campionato mundial de campo a través escolar e que redondearía meses despóis ca novena posición no Campionato de Europa Sub-18 celebrado en Jerusalén sobre a proba dos 2.000 obstáculos. Previamente a estas citas, lograba os títulos de campioa de España de campo a través, de 1.500 m, 2.000 obstáculos, 3.000 m. e de 5.000 m. logrando os récords de España de 1.500 m. e 3.000 m. en pista cuberta e 2.000 obstáculos de aire libre.
Tamén lograban proclamarse campións e campioas de España nas súas respectivas probas e categorías Jacobo Soler e Eva Queimaño na Sub-23; Xiana Lago, Hugo Vázquez, Pedro Santos, Alba Cuns e Paula Piñón na Sub-20; Ainhoa Repáraz, Aldara Meilán e Blanca Pereira na Sub-18; Teo de Frutos, Celia Castro, Enzo López na Sub-16 así como un total de 70 atletas másters nas súas distintas categorías e campionatos.
Mención aparte ten a cubana xavelinista ex-plusmarquista mundial Sub20 – e residente en Galicia desde hai uns anos- Yulenmis Aguilar quen lograba o triunfo no campionato de España (pero sen dereito a medalla) lanzando ata os 64.17 m. rexistro que a sitúan entre os postos top do ranking mundial.
