- Logo dunha pretempada case impoluta (so perdeu un partido e pola mínima), o Dépor ABANCA que adestra Irene Ferreras está listo para iniciar, mañá domingo 11 de setembro ás 12:00 en Abegondo, o curso 2022-23 contra o Rayo Vallecano, un dos clubs clásicos no fútbol feminino estatal, na 1ª xornada en Primeira Federación FutFem.
- Tres futbolistas da canteira: Paula Novo, Noela e Paula Monteagudo están citadas nesta primeira convocatoria de As Nosas.
O equipo branquiazul chega a este debut ligueiro con só unha derrota na pretemporada. O recentemente descendido de Primeira División SD Eibar, e pola mínima (1-2), foi o único equipo en todo o verán capaz de dobregar ás futbolistas que adestra Irene Ferreras.
Se facemos un repaso aos cruces de tempada das deportivistas, os que as levan a este primeiro cruce oficial de liga co Rayo Vallecano, todo os demais foron ou ben triunfos. Ante o Valadares Gaia FC (2-4), Viaxes InterRías FF (0-2) e Athletic Club B (3-0); ou ben empates ante FC Famalicão (2-2) e Real Oviedo (1-1), resoltos ambos nos penaltis a favor das branquiazuis. O balance goleador é ademais claramente favorable ao Dépor ABANCA, que neste test amigables anotou 13 dianas e encaixou 7.
Irene Ferreras citou a 18 xogadoras para este primeiro partido ante o Rayo Vallecano, entre as que non se atopa a última novidade, Sara Navarro, incorporada o pasado luns, finalizado o mercado de fichaxes, como axente libre.
Precisamente sobre Sara Navarro comentou Rocío Candal: “Pódenos achegar moito. Ten dous ascensos na súa traxectoria coa SD Eibar e a temporada pasada co FC Levante Las Planas. Ten experiencia en Primeira. Por perfil vai sumar moito tanto a nivel persoal como profesional”. Esas foron as palabras da responsable do RC Deportivo ABANCA, Rocío Candal, en rolda de prensa. Sara Navarro última a súa fase de adaptación ao grupo após estes primeiros días na Coruña.
O Rayo Vallecano é o ex equipo da, agora deportivista, Millene Cabral, e tamén forma parte do historial deportivo da adestradora, Irene Ferreras. A técnica madrileña comentaba na rolda de prensa previa ao partido ao respecto: “É un club onde eu crecín como futbolista e como persoa. Teño moi bos recordos e moi boas experiencias que tiven a sorte de vivir alí e sempre lle vou a gardar agarimo, porque representa moito no meu”.
Deportivamente explicaba a adestradora deportivista sobre o rival que o Rayo Vallecano “non deixa de ser un recentemente descendido. Si tivo moitas perdas a nivel de cadro porque tiña o nivel de Primeira División”. Advertía Irene Ferreras que as rayistas reforzáronse “con outras xogadoras que teñen nivel de Segunda e que quererán estar en Primeira. Un pouco incerto nese sentido, pero o nivel vai ser parello, cada partido vai ser complicado”.
Segundo explicaba a preparadora das branquiazuis este primeir partido de Liga “Afrontámolo con moitísimo respecto. Estamos preparadas para diferentes escenarios e a partir de aí ser capaces de ler o partido que toca, ser capaces de entender onde están os espazos e crecer desde aí”.
Convocatoria do Dépor ABANCA ante o Rayo Vallecano
Quedan fóra da convocatoria do Dépor ABANCA ante o Rayo Vallecao (por lesión) Letti Sevilla, cunha escordadura do ligamento lateral interno do seu xeonllo dereito; Carlota Sánchez, na recta final da súa recuperación do xeonllo operado antes da pretemporada; e Lorena Reina, á que se referiu o pasado xoves Irene Ferreras en rolda de prensa: “O outro día tivemos un sustiño (no seu xeonllo dereito). Quedou niso, así que eu creo que nuns días incorporarase co grupo”.
Paula Novo, Noela e Paula Monteagudo representan a #ANOSACANTEIRA na convocatoria:
O club coruñés mantén activo o protocolo de apertura con rexistro de asistentes da Cidade Deportiva de Abegondo. Coa fin de poder solicitar e recibir a entrada e, ademais, levar un control de repartición e localización na instalación, a entidade deportivista solicitou á afección, #ANosaForza, que retirase previamente as súas localidades para acudir a este partido até esgotar a capacidade das bancadas a través da web bancada.rcdeportivo.es.
Pediuse que unicamente tramitase a entrada aquelas persoas socias que vaian poder acudir ao partido, para evitar que queden afeccionados sen poder asistir unha vez completado a repartición do aforo nun proceso 100 % telemático.
Está previsto que, finalizado o encontro ligueiro, o cadro adestrarase de novo o luns 12 de setembro ás 09:00 en Abegondo posto que, sen descanso, o Dépor ABANCA recibe o mércores 14 de setembro ás 16:30 ao CD Parquesol na primeira eliminatoria de Copa de la Reina, a partido único.
