Raquel Carrera, MVP no seu 2º partido como internacional

A Selección Española de baloncesto colleita a segunda derrota no amigable contra Francia tras perder por un 72-45, pero cunha nota positiva. A xove ourensá Raquel Carrera, quen está a realizar unha tempada espectacular, foi a MVP do partido, con 13 créditos de valoración. A galega foi ademais a máxima anotadora nas filas hispanas, con 12 tantos.

Cabe salientar que este foi o segundo partido de Carrera como internacional absoluta, despois de estrearse este domingo no primeiro amigable fronte as galas, dentro da xira preparatoria do EuroBasket deste ano.

Raquel Carrera estréase coa Selección Española

Mondelo aposta de novo por Carrera e Abalde no quinteto inicial

De novo, a fortuna non estivo do lado das xogadoras españolas, que caeron derrotadas por segunda vez consecutiva ante o combinado estatal de Francia. No primeiro partido, dúas galegas formaron parte do quinteto inicial: Tamara Abalde, con experiencia como internacional, e Raquel Carrera, que debutaba nese partido coa camiseta vermella.

Para este segundo amigable, o seleccionador Lucas Mondelo seguiu confiando no dúo de galegas, apostando por elas para formar de inicio a parella interior. Silvia Domínguez, Marite Cazorla e Alba Torrens completaron o primeiro cinco do partido contra das galas.

Este es el QUINTETO INICIAL para el segundo partido de la #SelFEM 🇪🇸
🏆 Gira de preparación @EuroBasketWomen
🇫🇷 🆚 🇪🇸
⏰ 16:05 horas
📺 @teledeporte
📌 Toulouse#SomosEquipo pic.twitter.com/hbqUTL74i9
— Baloncesto España (@BaloncestoESP) May 24, 2021

Nos primeiros minutos as xogadoras galas dominaron por completo na pista, ante un combinado español sen acerto baixo o aro. As francesas aproveitaban os erros rivais para aumentar a súa renda, ata que Mondelo parou o reloxo para reactivar ás súas. Tras a pausa as españolas reaccionaron, pero sen o éxito esperado, polo que o primeiro cuarto rematou no 27-5.

No seguinte tempo, a Selección Española confiou máis no seu xogo e aumentou a presión nos ataques, subindo as liñas de pase e poñendo en apuros ás xogadoras de Valérie Garnier. O acerto por parte das francesas non diminuía, así que as hispanas simplemente puideron recortar distancias desde o rebote defensivo. O parcial finalizou co 37-22.

Tamara Abalde no España vs Francia previo ao Eurobasket / FEB

Na segunda parte o guion non cambiou e sobre a pista francesa seguía a verse a un equipo local superior ao visitante. A Selección loitaba cada balón desde a defensa, pero a falta de acerto cara o aro foi demasiado castigo para as de Mondelo. Pola súa parte, as galas medraban co paso dos minutos, rematando o terceiro cuarto nun 52-30.

Nos últimos dez minutos Francia non soltou o pé do acelerador, mentres que España optaba por unha defensa en zona para afastar ás pivotes rivais do aro. O acerto exterior das locais serviulles para sobrepoñerse a este cambio de sistema español, colocándose a máis de 30 puntos. Mondelo seguiu movendo o banco, dándolle minutos á tamén galega Paula Ginzo, sen que o resultado do marcador mudara a favor das españolas. O amigable resultou nun 72-45 final.

As estatísticas do amigable

Á fin do encontro, a xogadora máis destacada foi a ourensá Raquel Carrera, MVP do partido, máxima anotadora española con 12 puntos, a terceira mellor reboteadora e en facer os pases máis decisivos para o seu equipo. En total, a galega disputou máis de media hora sobre a pista.

Raquel Carrera, MVP do partido Francia vs España / FEB

Tamén competiu Tamara Abalde, cun punto para as españolas e máis de 20 minutos sobre a pista. A terceira galega, Paula Ginzo, só puido desfrutar de menos dun cuarto sobre a cancha, minutos nos cales non puido anotar ningunha canastra.

Podes consultar nesta ligazón as estatísticas ao completo.