Raquel Carrera estréase coa Selección Española

A Selección Española de baloncesto continúa o seu camiño cara o EuroBasket cos partidos de preparación da competición continental. No primeiro deles, ante Francia, a galega Raquel Carrera puido desfrutar dos seus primeiros minutos como internacional. Tamén xogaron Tamara Abalde e Paula Ginzo.

Este duelo inicial ante as galas saldouse con derrota española por un 66-57, nun amigable no que o obxectivo era buscar sensacións e non o resultado. As españolas repetirán na tarde deste luns, ás 16:05 horas, partido contra as francesas.

No encontro disputado este domingo, España foi de menos a máis, con Raquel Carrera como principal novidade no plantel de Lucas Mondelo, quen lle concedeu 31 minutos de competición. O seleccionador tamén cedeu tempo ás xóvenes Nogaye Lo e Maite Cazorla, con 21 e 20 minutos respectivamente.

A Selección Española con Carrera, Abalde e Ginzo - FEB — A Selección Española con Carrera, Abalde e Ginzo – FEB

Un debut ilusionante para Carrera

A xove xogadora galega estaba moi ilusionada pola súa estrea e no post partido admitiu que estaba “moi contenta. Tiña moitísimas ganas de debutar”. O debut non chegou con vitoria, pero para Raquel Carrera “o traballo que fixemos todo o equipo foi incríble”.

Raquel Carrera: “Tranquilizáronme dicíndome que era un partido máis, aínda que non era un partido máis”

Raquel Carrera coa Selección Española - FEB — Raquel Carrera coa Selección Española de baloncesto feminino – FEB

A pivote afrontou o encontro ante o combinado de Francia con moitos nervios, pero foi arropada polas súas compañeiras, quenes lle “axudaron moito e tranquilizáronme dicíndome que era un partido máis, aínda que non era un partido máis”. Este luns terán o segundo asalto, que a ourensá prepara “con ganas. Xa tivemos o primeiro contacto con elas, sabemos como son e xa as temos pilladas”.

📹 La ILUSIÓN al debutar con la #SelFEM 🇪🇸
🎙️ @raquelcarrera_: “No era un partido más”
#SomosEquipo pic.twitter.com/6n4kYfXIsE
— Baloncesto España (@BaloncestoESP) May 23, 2021

Toma de contacto da Selección Española

O partido comezou cun quinteto titular con acento galego, coa presenza de Raquel Carrera e Tamara Abalde como parte da aposta inicial de Mondelo. A propia ourensá foi a encargada de abrir o marcador no seu primeiro partido como internacional. No primeiro cuarto, as xogadoras francesas apretaban máis e levábanse a vitoria por un 17-10.

No segundo cuarto as francesas pisaron o acelerador e presionaban ás vermellas, que porén igualaban forzas malia a falta de acerto desde a liña de tres. No seguinte tempo o guion mudou lixeiramente, coas galas cada vez máis crecidas na pista e ameazando con darlle a volta ao marcador. Charlereau foi a máxima anotadora do partido para o combinado estatal francés, mentres que a Selección de España optaba por un xogo máis coral.

Paula Ginzo coa Selección Española - FEB — Paula Ginzo coa Selección Española de baloncesto feminino – FEB

No último cuarto as españolas estaban contra as cordas, tentando salvar o resultado a favor. Unha serie de canastras fáciles para as francesas inclinou a balanza ao seu lado, mentres que no bando vermello Alba Torrens anotaba desde o triplo e Raquel Carrera loitaba cun corpo a corpo con Ciak. Finalmente, as locais foron superiores no tramo final do duelo, vencendo no primeiro enfrontamento deste preparatorio por un 57-66.

Neste partido, Tamara Abalde disputou nove minutos e medio, Raquel Carrera 31 e medio, anotando 8 puntos e Paula Ginzo once minutos e medio, sen acerto baixo aro.