Tres galegas entran na lista de Lucas Mondelo para a preparación do Eurobasket Feminino 2021. Raquel Carrera, Tamara Abalde e Paula Ginzo están entre as 17 xogadoras convocadas pola Selección Española.
Coa LF Endesa xa concluída e a un mes e medio do inicio do Campionato de Europa, que terá lugar en Valencia do 17 ao 27 de xuño, as baloncestistas preparan o continental. Destas 17 só 12 serán as finalmente seleccionadas para competir en terras valencianas este verán.
Mondelo, á cabeza do corpo técnico e a Área Deportiva da FEB, con José Ignacio Hernández, foron os encargados de confeccionar a lista. Esta conta con xogadoras de gran experiencia internacional, pero tamén con mozas que son promesas do baloncesto español pero demostraron estar xa preparadas para competir ao máximo nivel.
A Selección Española, campioa de Europa en 2017 e 2019, defenderá a súa coroa en Valencia, sede do segundo Eurobasket Feminino en España, tras o celebrado en 1987. España iniciará a concentración o 15 de maio en Madrid.
A segunda convocatoria de Raquel Carrera
Para a ourensá de 19 anos Raquel Carrera esta será a segunda concentración coa Selección Absoluta. A xogadora do Valencia Basket está a vivir unha tempada ilusionante, sendo unha peza clave do equipo taronja na LF Endesa, na Copa da Raíña e outorgándolle ao club o título da Eurocup.
A galega Raquel Carrera, clave na vitoria do Valencia como campión da Euro Cup
Na competición española, o Valencia Basket disputou en tres partidos a loita polo título de liga contra o Perfumerías Avenida, con vitoria final para as salamantinas. Porén, no partido de ida, Carrera foi a xogadora máis destacada, converténdose na MVP do encontro.
Abalde e Ginzo repiten coa vermella
Pola súa banda, esta non será a estrea das outras dúas galegas, Tamara Abalde e Paula Ginzo. A ala-pivote, actual xogadora do Lointek Gernika, suma xa catro veces como internacional.
No que se refire a Abalde, nova fichaxe do Durán Maquinaria Ensino, a galega acumula 57 ocasións vestida coa camiseta da Selección Española.
A convocatoria da Selección Española
O listado da Selección Española ao completo é o seguinte:
- Silvia Domínguez – Perfumerías Avenida
- Laia Flores – SPAR Girona
- Cristina Ouviña – Valencia Basket
- Laia Palau – SPAR Girona
- Maite Cazorla – Perfumerías Avenida
- Leticia Romero – Valencia Basket
- Queralt Casas – Valencia Basket
- Leonor Rodríguez – Perfumerías Avenida
- María Conde – USK Praga
- Alba Torrens – UMMC Ekaterimburgo
- Laura Quevedo – Movistar Estudiantes
- Raquel Carrera – Valencia Basket
- Laura GIl – Valencia Basket
- Paula Ginzo – Lointek Gernika
- Tamara Abalde – Durán Maquinaria Ensino
- Nogaye Lo – Lointek Gernika
- Astou Ndour – Hatay BB
