Elena Ramil, xogadora de baloncesto no Herrera y Cores Clínica Dental Culleredo, equipo da 1º División Autonómica Feminina, acaba de ser intervida do menisco, unha lesión que a terá alonxada das pistas arredor de catro meses.
O conxunto cullerdense, que lidera a clasificación do Grupo C e conta todos os seus encontros por vitorias, terá que continuar a súa andanza sin a nova xogadora, quen nos atendeu con total amabilidade tan só un día despois de abandoar a clínica onde foi intervida. En As Nosas falamos con ela, sobre a tempada tan difícil que estamos a vivir e tamén sobre o futuro.
As Nosas: En primeiro lugar, toca preguntar, que tal Elena? Que tal a operación?
Elena Ramil: A verdade é que todo saíu xenial, sin maior complicación. Presentaba unha rotura no menisco e durante a intervención os doutores atoparon algúns anacos de cartilaxe que tiveron que retirar. Pensan que a dor que sentía eran provocada, máis que polo menisco, por estes pedaciños de tecido elástico. Agora tan só penso na recuperación. Agardo acurtar os prazos ao máximo.
A.N.: Unha lesión de menisco son aproximadamente, tres ou catro meses, non?
Elena Ramil: Si, así é. Dinme que aproximadamente poderei andar sin problemas nun mes, pero para poder voltar á competición o prazo alóngase máis. De todos modos, este tempo tamén depende moito da rehabilitación e da persoa, polo que non podemos falar dun tempo exacto. Xa me tarda volver.
A.N.: Tiveras máis lesións no pasado?
Elena Ramil: Serias como esta, non. Hai uns anos pasara por varias escordaduras de nocello, cousa que é inevitable xogando a baloncesto, un deporte no que empregas moitísimo o xogo de pés. Pero nunha tempada tan particular, tocoume vivir a miña primeira lesión seria. Agora toca mirar cara adiante e pensar en recuperarse o mellor posible e volver aínda máis forte.
“Nunha tempada tan particular, tocoume vivir a miña primeira lesión seria. Agora toca mirar cara adiante e pensar en recuperarse o mellor posible e volver aínda máis forte.”
A.N.: Co avance da competición, que balance fas da mesma?
Elena Ramil: Deportivamente, as sensacións non podían ser mellores. Somos primeiras de grupo e contamos os nosos partidos por vitorias, pero ademais dos resultados, hai que quedarse co bo xogo de todo o equipo. Agora vén o mellor, xa que só levamos xogada a primeira fase e, desgraciadamente, tocarame vivila desde fóra.
A.N.: Entendo que o contexto sanitario complica moito as cousas.
Elena Ramil: Cambia todo moito, dependemos de moitas particularidades. Cada semana sae unha medida nova e o período de adaptación ten que ser inmediato, pero si queres competir, é o que hai. Fisicamente é máis complexo, porque ao final non consegues a regularidade idónea para competir nas mellores condicións, pero tamén entendo que todas partimos da mesma base. Son moitos cambios si o comparamos a unha tempada ‘normal’, pero hai que pensar sempre en positivo.
Ramil recibiu o apoio do resto da plantilla do CB Culleredo
As compañeiras de equipo de Elena Ramil enviaron o seu apoio á deportista lesionada a través das redes sociais do club. Posaron coa súa camiseta e trasladáronlle o seu desexo de vela “pronto na pista”.
Todo o noso apoio e cariño para a nosa xogadora senior @elenaramil que foi operada hoxe dunha lesión de xeonllo.
Esperamos verte pronto na pista.
Moito ánimo!🏀💙😘 pic.twitter.com/60OxgPQSNd
— CB Culleredo (@CBCulleredoCom) February 18, 2021
A.N.: O xesto que tiveron as túas compañeiras di todo o que sodes como grupo, non?
Elena Ramil: Por suposto. Sorprendeume moito polo momento, pero non polo que entraña, xa que son todas unhas persoas excelentes. Somos todas moi amigas e, ao final, é iso co que te tes que quedar. Evidentemente, a conexión entre nós trasládase á pista, e esa complicidade que temos fóra axúdanos a contar, polo momento, os encontros por vitorias. A base de todo é apoiarse, e nese sentido eu síntome moi arroupada por todas elas.
“A conexión entre nós trasládase á pista, e esa complicidade que temos fóra axúdanos a contar, polo momento, os encontros por vitorias. A base de todo é apoiarse, e nese sentido eu síntome moi arroupada por todas elas.”
A.N.: Que mensaxe lle darías ás deportistas que están a pasar, como ti, por unha lesión?
Elena Ramil: Dada a miña experiencia, o que lles diría é que non perdan a ilusión, eu non o fago. Non perdo nin un segundo a ilusión de volver a tocar balón e adestrar coas miñas compañeiras. Que a xente non pense que todo remata aquí, non hai que deixarse influenciar polo negativo. Non hai que baixar os brazos baixo ningún concepto.
