- O Raid Gallaecia, que se disputará os días 8 e 9 de outubro na Reserva da Biosfera Mariñas Coruñesas e Terras do Mandeo, comparte os valores do roteiro xacobeo: cohesión, hospitalidade, multiculturalismo, sustentabilidade…
- O percorrido, de 200 quilómetros non-stop con saída e chegada en Betanzos combinando as disciplinas de trekking, bicicleta de montaña, kaiak, rápel e orientación, levará aos participantes polo Camiño de Santiago Inglés.
O Raid Gallaecia repite como evento Xacobeo 21-22. Se o ano pasado acolleu o Campionato do Mundo de carreiras de aventura con difusión en 90 países de todo o planeta, o próximo mes de outubro será o escenario do Campionato de Europa, unha nova ocasión para presentar a Galicia como excepcional destino turístico a través do deporte, a natureza e o Camiño de Santiago.
A proba, que se disputará os días 8 e 9 de outubro na Reserva da Biosfera Mariñas Coruñesas e Terras do Mandeo, comparte os valores do roteiro xacobeo: cohesión, pola integración da comunidade local; hospitalidade, polo carácter acolledor dos galegos; multiculturalismo, polo encontro de diferentes manifestacións culturais, ou sustentabilidade, polo concepto de viaxar dunha forma respectuosa co medio ambiente.
200km sen parar con saída e chegada en Betanzos para este Raid Gallaecia
O Raid Gallaecia, de 200 quilómetros non-stop con saída e chegada en Betanzos, atravesará varios tramos do Camiño de Santiago Inglés combinando as disciplinas de trekking, bicicleta de montaña, kaiak e rápel. Os detalles do roteiro manteranse en segredo ata momentos antes da saída porque unha das disciplinas básicas das carreiras de aventura é a orientación e os participantes terán que trazar o percorrido coa axuda dun compás e os mapas que lles facilita a organización.
Equipos mixtos de catro integrantes, con polo menos unha muller e procedentes de Francia, Dinamarca, Estonia ou Países Baixos, entre outros países, tratarán de conquistar o título continental e o billete para o Campionato do Mundo 2023 que se celebrará en Sudáfrica.
Coa organización do Campionato de Europa de carreiras de aventura, Galicia e, en especial, o territorio de Mariñas Coruñesas e Terras do Mandeo lograrán unha visibilidade sen igual a nivel continental dado que haberá sinal vía streaming para 90 países e mostraranse algúns dos recunchos naturais da Reserva, sendo un reclamo excepcional para o turismo de aventura.
A oitava edición do Raid Gallaecia, proba adscrita ás Series Mundiais de carreiras de aventura (ARWS, polas súas siglas en inglés), será tamén o escenario para a cuarta carreira da liga Española de Raids de Aventura e a quinta manga da liga Galega de Raids.
A Reserva da Biosfera Mariñas Coruñesas e Terras do Mandeo, escenario de luxo para o Raid Gallaecia
