Se hai uns días A Fervenza presentaba a renovación de Chipi como adestrador do primeiro equipo, no que supoñerá a súa terceira tempada con equipo ferrolán, o equipo rosa pechou a renovación da capitá Raquel Rodríguez Ferreiro, “RA” co que cumprirá a súa 12ª tempada na entidade galega.
Desde A Fervenza fixeron unha entrevista a súa xogadora para anunciar a súa renovación.
Pregunta: Que ten o rosa para que leves toda unha vida deportiva aferrada a esta camiseta e este escudo?
Resposta: Este club xa é a miña casa, agora mesmo non me imaxino outro sitio mellor para poder seguir aprendendo e gozando do futbol sala.
P: Tantos anos ligada A Fervenza capacítanche para dicir que é iso de “Familia Rosa ou Familia A Fervenza”.
R: Desde o primeiro ano aquí deime conta de que calquera problema que teñas van axudar, e sempre van estar aí tanto as túas compañeiras, como a directiva e mesmo a afección, que había unha unión especial e hoxe todo segue igual. Como di unha das nosas cancións: Un sentimento, non trates de entendelo.
P: Como valorarías a tempada 2019-2020, recentemente finalizada, aínda que dunha maneira atípica, tanto a nivel individual como do colectivo?
R: Non foi unha das nosas mellores tempadas nin de lonxe. Tivemos varias lesións importantes e en moitos partidos dispoñiamos de poucas xogadoras; isto fíxoo máis difícil pero, aínda así, non obtivemos unha mala posición. A nivel persoal fun de menos a máis; despois de dous meses parada por unha lesión, creo que cheguei a un bo nivel.
P: Parece obvio que a seguinte pregunta céntrese nos motivos polos que selaches a túa continuidade, unha tempada máis, neste proxecto.
R: Tiña claro que quería renovar, e despois de como acabou esta tempada teño máis ganas de volver co
meu equipo.
P: Chipi renovou como adestrador e cales son as túas impresións ao respecto diso?
R: Cando me decatei da renovación de Chipi gustoume a noticia. Desde que está connosco aprendemos
moito del e paréceme un gran adestrador.
P: En canto á nova tempada, como a afrontas? Obxectivos, tanto individuais como grupais e expectativas.
R: O primeiro con moitas ganas. A nivel individual quero chegar a dar o meu 100% e así axudar máis ao equipo, e, a nivel grupal, gustaríame que fósemos máis regulares e poder chegar ás posicións altas da clasificación.
P: Para alguén que se impregnou da filosofía de canteira de A Fervenza, cales crees que son os
principais valores que aprendiches no club rosa?
R: Principalmente o que aprendín foi o compromiso que hai que ter nun deporte de equipo, a confianza
tanto nas xogadoras como nos técnicos e a constancia que hai que ter cando queres chegar a algo.
P: Que lle dirías a todas esas nenas ás que lles gusta o fútbol sala e aínda non se decidiron a practicalo baixoa tutela dun Club cunha estrutura como é o do club ferrolán?
R: Diríalles que se lles gusta este deporte é o mellor sitio para empezar e formarse. Que veñan probar e que se acabasen enganchando a este club.
P: E, como non, a esas 70 nenas que conforman o noso maior legado, que é a nosa Escola de Fútbol sala
Feminino, que poidan estar a pensar o alcanzar metas tan altas como as que ti lograches, ou mesmo superiores?
R: A todas nosas nenas diríalles que sigan aprendendo e evolucionando como o están facendo, que chegarán
tan alto como elas queiran.
Agora é o momento de coñecer un pouco mellor á RA futbolista. Como che defines como xogadora? Cal é a túa posición na cancha?
R: Eu diría que son unha xogadora que non destaca polo seu xogo, pero si por facer “o traballo sucio”. A miña posición normalmente é de peche, que é onde levo xogando desde sempre, pero este último ano estiven a xogar máis de á.
P: En todas estas tempadas, cal é o teu mellor recordo? e o peor?
R: O meu mellor recordo foi o ano do ascenso, tanto por gañar a liga e a copa como polos dous campionatos de España aos que fomos. E o peor foi o ano pasado, tras estar case tres meses sen xogar.
P: O teu quinteto ideal de todas as xogadoras que pasaron polo Club?
R: No meu quinteto poñería a: Leti en portería, Mavi, Ale de Paz, Lau Doce e Elvi.
P: Cal é para ti a mellor xogadora de futsal na actualidade?
R: A mellor xogadora agora mesmo para min é Anita Luján.
P: E a mellor de todas coas que compartiches vestiario?
R: Diría Ale de Paz.
P: E, para pechar a entrevista, como voz autorizada do vestiario, como poder que che outorga o levar o brazalete de capitá nas últimas tempadas, que sente unha xogadora da Fervenza cando se enfunda a camiseta rosa e deféndea, ata o fin da batalla, co arroupe da afección.
R: O que eu sinto, como calquera das miñas compañeiras, é ilusión por gañar ese partido, forza desde as
bancadas e sobre todo unión; nos malos partidos é a nosa afección a que nos axuda a seguir dándoo todo.
